បើនិយាយដល់តួកុនស្រីដ៏ល្បីល្បាញ អ្នកនាង ឌុច សោភា ប្រិយមិត្តភាគច្រើនច្បាស់ជានឹកដល់ទេពកោសល្យសម្ដែងដ៏រស់រវើកបែបធម្មជាតិរបស់នាងជាក់ជាមិនខាន ដោយកន្លងមក តារាស្រីរូបនេះធ្លាប់បង្ហាញវត្តមានសម្ដែងក្នុងខ្សែភាពយន្តខ្មែរជាច្រើន ចាក់ផ្សាយនៅលើកញ្ចក់ទូរទស្សន៍ ហើយកាលនោះ មហាជនផ្ទុះការគាំទ្រលើរូបនាងយ៉ាងច្រើនផុសផុល។
យ៉ាងណាមិញ ច្រើនឆ្នាំក្រោយមកនេះ ឌុច សោភា បានផ្អឹបចោលទេពកោសល្យសម្ដែងរបស់នាងឈឹង ដោយតារាស្រីរូបនេះ លែងបង្ហាញវត្តមានថតរឿង ឬ ថតខារ៉ាអូខេដើម្បីបម្រើជូនអារម្មណ៍ទស្សនិកជនបានទស្សនាកម្សាន្តដូចកាលពីមុនទៀតហើយ ដោយបច្ចុប្បន្ន អ្នកនាងចាយជីវិតរស់នៅជីវិតឯកជនយ៉ាងរីករាយជាមួយកូនប្រុសបណ្ដូលចិត្ត។
ដ្បិតថាវត្តមានការសម្ដែងក្នុងខ្សែភាពយន្តផ្សេងៗ ឌុច សោភា បានអាក់ខានច្រើនឆ្នាំ ប៉ុន្ដែអ្នកនាងមិនទុកឱ្យខ្លួនឯងឃ្លាតឆ្ងាយពីអ្នកគាំទ្រទេ ដោយជារឿងៗ អតីតតួឯកស្រីដ៏ល្បីល្បាញរូបនេះ តែងថតវីដេអូបង្ហាញពីសកម្មភាពនៅផ្ទះ បង្ហោះលើ Tiktok ក៏ដូចជាបង្ហោះលើហ្វេសប៊ុកផ្ទាល់ខ្លួន ឆ្លើយឆ្លងខំមិនជាមួយមហាជនអ្នកគាំទ្រ ពោលគឺបច្ចុប្បន្នអ្នកនាងរស់នៅក្នុងជីវិតដ៏រីករាយមួយ៕
