អ្នកគាំទ្រតាមដានពីស្រីស្អាតស្រអែមស្រស់កញ្ញា កុយ អេនណា សុទ្ធសឹងតែបានជ្រាបហើយពីជីវិតសិល្បៈ និង ក្ដីស្រមៃរបស់នាង ដោយកន្លងមកនាងធ្លាប់ប្រឡូកក្នុងវិស័យបវរកញ្ញាម្ដងហើយក្នុងកម្មវិធីប្រកួតក្នុងស្រុក MGC អំឡុងឆ្នាំ ២០២៣ កន្លងទៅ ដ្បិតតែមិនទទួលបានជោគជ័យគ្រងមកុដ តែនាងក៏មានតំណែងជាលំដាប់រងទី ១ និង ឆក់បានក្ដីស្រឡាញ់គាំទ្រពីមហាជនមិនធម្មតាដែរ។
យ៉ាងណាមិញ ប៉ុន្មានឆ្នាំក្រោយប្រកួតវិស័យបវរកញ្ញានេះ កុយ អេនណា ក៏កាន់តែបង្ហាញភាពលេចធ្លោរបស់ខ្លួន និង ក្លាយជាគ្រាប់ពេជ្រក្នុងចិត្តអ្នកគាំទ្រវិស័យបវរកញ្ញា ដោយកាន់តែស្រឡាញ់ពេញចិត្តនាងខ្លាំងឡើង ជាមួយនឹងភាពជឿជាក់ សម្រស់ ចំណេះដឹង សមត្ថភាព និង ទេពកោសល្យផ្សេងៗ។
លើសពីនេះ បវរកញ្ញា កុយ អេនណា តែងឆក់បានការចាប់អារម្មណ៍ និង សរសើរខ្លាំងពីមហាជនចំពោះសកម្មភាព ក៏ដូចជារូបភាពថ្មីៗជាច្រើនដែលនាងបានថតបង្ហាញពីកន្លែងមួយទៅកន្លែង ឃើញថាសុទ្ធសឹងតែរំលេចនូវសម្បត្តិវប្បធម៌ខ្មែរ ដែលនាងបង្ហាញពីគោលបំណងចង់ចូលរួមជាចំណែកមួយជួយផ្សព្វផ្សាយពីវប្បធម៌ និង វិស័យទេសចរណ៍ជាតិ។
ស្របគ្នានេះ កុយ អេនណា ក៏ត្រូវបានមហាជនជាច្រើននៅតែបង្ហាញការស្ដាយពីសមត្ថភាពរបស់នាង ដែលតែងលើកទឹកចិត្តជំរុញឱ្យនាងវិលចូលប្រកួតក្នុងកម្មវិធីប្រកួតសម្រស់ណាមួយម្ដងទៀត និង ចង់ឃើញនាងអាចមានឱកាសឈរលើឆាកអន្តរជាតិដូចបំណង ក្រោយពីធ្លាប់បរាជ័យម្ដងនោះ។
ដ្បិតតែទទួលបានការគាំទ្រលើកទឹកចិត្តជំរុញឱ្យចូលប្រកួតបវរកញ្ញាជាថ្មី ប៉ុន្តែឃើញថា កញ្ញា កុយ អេនណា មិនបានគិតគូរចង់បន្តក្ដីស្រមៃលើវិស័យនេះឡើយ តែបែរជាបន្តបង្ហាញសកម្មភាពជួយដល់ប្រទេសជាតិតាមរយៈកម្មវិធីសប្បុរសធម៌ ថតផ្សព្វផ្សាយវប្បធម៌ និង ទេសចរណ៍ជាហូរហែវិញ។
ជាក់ស្ដែង ថ្មីៗកន្លងទៅនេះ កុយ អេនណា កាន់តែធ្វើឱ្យមហាជនអ្នកគាំទ្រសរសើរស្ងប់ស្ងែងពេញដោយក្ដីមោទកភាព ក្រោយនាងបង្ហាញការលះបង់ទាំងសម្រស់ និង កម្លាំងកាយចិត្ត ធ្វើដំណើរថ្មើរជើងពីភ្នំពេញទៅកាន់ខេត្តសៀមរាបក្រោមប្រធានបទ «ដើរដោយក្ដីសង្ឈឹម ដើរដើម្បីទេសចរណ៍» ដើម្បីធ្វើមូលនិធិសម្បុរសធម៌ជួយកុមារពិការកម្ពុជា និង ចូលរួមជួយផ្សព្វផ្សាយពីទេសចរណ៍កម្ពុជាផងដែរ៕
