ដំណើរសិល្បៈតាំងពីកុមារភាព ព្រះនាងតូច ចេនណា បង្ហាញសមត្ថភាពសាងកេរ្តិ៍ឈ្មោះជូនកម្ពុជាគួរឱ្យស្ងប់ស្ងែង

បើទោះជាមានព្រះជន្មទើបតែ ១៣ ព្រះវស្សា ពិតមែន ប៉ុន្តែព្រះនាងតូច នរោត្តម ចេនណា បានសាងកិត្តិនាមយ៉ាងល្បីខ្ទរខ្ទារក្នុងនាមជាសិល្បការិនីវ័យក្មេងរបស់កម្ពុជា ដោយទទួលបានការគាំទ្រយ៉ាងខ្លាំងទាំងក្នុង និង ក្រៅប្រទេស។ ព្រះនាងតូច ចេនណា ត្រូវបានចាត់ទុកជាសិល្បការិនីពហុជំនាញមួយរូប ដោយព្រះនាងមានទេពកោសល្យទាំងផ្នែកចម្រៀង តន្ត្រី របាំបុរាណ សម័យ និង ការសម្តែងថែមទៀតផង។

ថ្មីៗកន្លងទៅនេះ មហាជនច្បាស់ជាបានជ្រាបមកហើយនូវសមិទ្ធផលដ៏អស្ចារ្យជាច្រើនរបស់ព្រះនាងតូច នរោត្តម ចេនណា នៅលើវិថីសិល្បៈ ដោយទ្រង់បានបង្ហាញព្រះវត្តមានជាច្រើនលើក ជាច្រើនសារលើឆាកអន្តរជាតិ។ លើសពីនោះ នៅក្នុងឆ្នាំ ២០២៥ នេះ ព្រះនាងតូច ចេនណា បានក្លាយទៅជាយុវតីកម្ពុជាវ័យក្មេងជាងគេ ដែលទទួលបានរង្វាន់ Role Model Inspiration Hall Of Fame នៅក្នុងព្រឹត្តិការណ៍ HOFS Awards 2025 ប្រទេសសិង្ហបុរី ទៀតផង។

ដោយឡែក ក្រៅពីល្បីរន្ទឺក្នុងវិស័យសិល្បៈ ព្រះនាងតូច ចេនណា ក៏ត្រូវបានប្រជានុរាស្ត្រលើកសរសើរពីកិត្តិនាមរបស់ព្រះនាងតូច ដែលមានវ័យក្មេង ប៉ុន្តែព្រះនាងតូចបានជួយទុក្ខធុរៈប្រជាជនជាច្រើនកន្លងមកនៅក្នុងសង្គម ដែលពិតជាធនធានមនុស្សដ៏ល្អផូរផង់៕