និយាយពីលោក សន ពិសិដ្ឋ មហាជនអ្នកគាំទ្រសុទ្ធសឹងតែស្គាល់ហើយថា លោកជាតារាសម្ដែងប្រុសដ៏មានប្រជាប្រិយភាពមួយរូបក្នុងវិស័យសម្ដែងភាពយន្តខ្មែរ ដោយកន្លងមក លោកទទួលបានការស្រឡាញ់គាំទ្រពីមហាជនតាមរយៈស្នាដៃសម្តែងខ្សែភាពយន្តជាច្រើន ដែលអាចសម្ដែងជាតួអង្គច្រើនទម្រង់ពេញដោយទេពកោសល្យដ៏ប៉ិនប្រសប់។
ម្យ៉ាងវិញទៀត តារាសម្តែងប្រុសរូបនេះ មិនត្រឹមតែត្រូវបានមហាជនចាប់អារម្មណ៍ ចំពោះសមត្ថភាពទេពកោលស្យក្នុងវិស័យសម្ដែងនោះទេ តែមហាជនក៏តែងសរសើរជាមួយនឹងរូបសម្រស់ កាយសម្បទាមាំមួន សាច់ដំធំៗ រូបរាងស្រស់សង្ហា និង មានទម្រង់មុខខ្មែរ មានមន្តស្នេហ៍យ៉ាងទាក់ទាញទៀតផង។
យ៉ាងណាមិញ មកដល់មួយរយៈក្រោយនេះ ដ្បិតតែតារាសម្ដែងប្រុសរូបសង្ហា សន ពិសិដ្ឋ មិនសូវបង្ហាញមុខសម្ដែងខ្សែភាពយន្តផ្សេងៗដូចមុនមែន ប៉ុន្តែលោកកំពុងក្ដោបបានប្រជាប្រិយភាពខ្លាំងពីមហាជនលើបណ្ដាញសង្គមវិញ តាមរយៈការសម្ដែងសាច់រឿងខ្លីៗបែបកំប្លែងៗ។
ក្នុងវីដេអូសាច់រឿងខ្លីៗនោះ លោក សន ពិសិដ្ឋ ត្រូវបានគេចាប់អារម្មណ៍ថាលោកចូលចិត្តតុបតែងស្លៀកពាក់ជាមនុស្សស្រី និង សម្ដែងលេងអត្តចរិតបែបកំប្លែងៗជាមួយនឹងតារាប្រុសស្រីប៉ុន្មានរូបទៀត ដែលឆក់បានការចាប់អារម្មណ៍ចូលចិត្តទស្សនារពីមហាជនជាច្រើនលើបណ្ដាញសង្គមផងដែរ៕
