បើនិយាយពី អាជីវកម្មហាងមាសពេជ្រ ឬ ហាងគ្រឿងអលង្ការប្រណីតនៅកម្ពុជា ភាគច្រើនធ្វើឡើងជាលក្ខណៈគ្រួសារ ឬ ទៅតាមប្រពៃណី។ តែយ៉ាងណាមិញ ធនធានជំនាន់ថ្មី ជាមនុស្សសម័យទំនើប បានអភិវឌ្ឍបន្ថែមទៀតលើគន្លងចាស់ ដោយស្រូបយកជំនាញបន្ថែមនៅឯបរទេស មកអភិវឌ្ឍអាជីវកម្មឱ្យកាន់តែជឿនលឿន និង ត្រូវទៅតាមតម្រូវការទីផ្សារ។ តួយ៉ាង ដូចជា បុគ្គលពីររូបនេះ ទាំងសង្ហា ទាំងវ័យក្មេង សុទ្ធតែកើតក្នុងគ្រួសារបើកអាជីវកម្មគ្រឿងអលង្ការ។ ពួកគេបានចេញទៅស្វែងយល់បន្ថែមនៅឯបរទេស សព្វថ្ងៃ ក្លាយជាអ្នកច្នៃម៉ូដគ្រឿងអលង្ការដ៏ជំនាញ និង ជា CEO ប្រចាំហាងគ្រឿងអលង្ការល្បីជួរមុខនៅកម្ពុជា។
១. លោក ឈិន ថង
នៅក្នុងវិស័យគ្រឿងអលង្ការ លោក ឈិន ថង ត្រូវបានគេស្គាល់យ៉ាងច្បាស់ ជាអ្នកច្នៃម៉ូដ និង ជា CEO នៃហាង មាស ពេជ្រ ដ៏ល្បីនៅទីក្រុងភ្នំពេញគឺ Jin Hoc Jewelry។ នៅឆ្នាំ ២០១៧ លោក ឈិន ថង បានបញ្ចប់ការសិក្សាឯកទេសខាងត្បូង និង ច្នៃម៉ូដពី GIA ដែលជាវិទ្យាស្ថានល្បីល្បាញលំដាប់ពិភពលោក ខាងបណ្តុះបណ្តាលផ្នែកត្បូងវិទ្យា និងសិល្បៈគ្រឿងអលង្ការ ដែលមានមូលដ្ឋាននៅឯរដ្ឋកាលីហ្វូញ៉ាសហរដ្ឋអាមេរិក។ ក្រៅពីបញ្ចប់ការសិក្សានៅសហរដ្ឋអាមេរិក លោកក៏បានបញ្ចប់វគ្គសិក្សាខ្លីៗមួយចំនួនដែលទាក់ទងនឹងការច្នៃម៉ូដគ្រឿងអលង្ការនៅប្រទេសសិង្ហបុរីផងដែរ។
២. លោក វណ្ណ រដ្ឋា
លោក វណ្ណ រដ្ឋា បច្ចុប្បន្ន ជានាយកប្រតិបត្តិ (CEO) និង ជានាយកច្នៃប្រឌិត នៃក្រុមហ៊ុនគ្រឿងអលង្ការដ៏ល្បីនៅកម្ពុជា គឺ ជាងបាក់ វណ្ណស៊ី ឬ CBVS ។ នៅក្នុងតួនាទី លោកតែងត្រួតពិនិត្យលើគំនូរ sketches ពិនិត្យត្បូង និង ពិភាក្សាសមាសភាពជាមួយក្រុមឌីហ្សាញរបស់លោក។ ជាមនុស្សសម័យថ្មី លោក វណ្ណ រដ្ឋា មិនបានដើរតាមគន្លងគ្រឿងអលង្ការប្រពៃណី ដែលធ្វើតាមឪពុកម្តាយ និង សាច់ញាតិឡើយ ពោល ជំនួសមកវិញ លោកបានបន្តការសិក្សាទៅលើការច្នៃម៉ូដគ្រឿងអលង្ការ និង ត្បូងពេជ្រ នៅវិទ្យាស្ថាន Gemological Institute of America ឬ GIA ដែលជាវិទ្យាស្ថានត្បូងពេជ្រដ៏ល្បីល្បាញនៅសហរដ្ឋអាមេរិក។ ជាសមិទ្ធផល ស្នាដៃគ្រឿងអលង្ការរបស់លោក មានភាពទាក់ទាញយ៉ាងស៊ីជម្រៅនឹងវប្បធម៌ខ្មែរ ជាពិសេសចម្លាក់ប្រាសាទ គំនូរផ្កាខ្មែរ និង ឥទ្ធិពលស្ថាបត្យកម្ម។ មួយក្នុងចំណោមនោះ ខូឡិកហ្សិន ផ្កាឈូក (Lotus Collection) គឺជាឧទាហរណ៍ជាក់ស្តែង និង ទទួលបានការចាប់អារម្មណ៍ខ្លាំង៕
