ជាប់ត្រឹមលំដាប់រង តែ ប៊ី សុធារី និង ស៊ីដនី ម៉ារិទ្ធ មានឥទ្ធិពលនៅឆាកអន្តរជាតិមិនចាញ់ម្ចាស់មកុដ

អ្នកគាំទ្រវិស័យបវរកញ្ញាដែលតាមដានកម្មវិធី Miss Supranational Cambodia 2025 និង កម្មវិធី Miss Cosmo Cambodia 2025 កន្លងមក ក្រៅពីចាប់អារម្មណ៍សរសើរពីរាជិនីម្ចាស់មកុដថ្មីប្រចាំឆ្នាំ ឃើញថាចំពោះលំដាប់រងទី ១ នៃកម្មវិធីទាំងពីរ គឺកញ្ញា ស៊ីដនី ម៉ារិទ្ធ និង កញ្ញា ប៊ី សុធារី ក៏មានភាពលេចធ្លោឆក់បានការគាំទ្រមិនធម្មតាដែរ។

ពិតណាស់ ដ្បិតតែប្រកួតជាប់ត្រឹមជ័យលាភីរងទី ១ កញ្ញា ស៊ីដនី ម៉ារិទ្ធ និង កញ្ញា ប៊ី សុធារី ក៏នៅតែជាគ្រាប់ពេជ្រដ៏មានសមត្ថភាព ចំណេះដឹង និង ភាពលេចធ្លោក្នុងចិត្តមហាជនដែលស្រឡាញ់គាំទ្រអ្នកទាំងពីរ ព្រមទាំងអ្នកទាំងពីរ ក៏កំពុងក្ដោបបានទីផ្សារការងារផ្សេងៗជាបន្តបន្ទាប់ ទាំងក្នុង និង ក្រៅប្រទេស មិនចាញ់ម្ចាស់មកុដប៉ុន្មានឡើយ។

ជាក់ស្ដែង ចំពោះ កញ្ញា ស៊ីដនី ម៉ារិទ្ធ លំដាប់រង ១ MSC 2025 ក្រៅពីក្ដោបបានឱកាសការងារផ្សេងៗនៅក្រៅប្រទេស ថ្មីៗកន្លងទៅ នាងក៏ទទួលបានឱកាសដ៏អស្ចារ្យ ដែលត្រូវបានជ្រើសរើសក្លាយជាម្ចាស់មកុដថ្មីនៃ Miss Planet Cambodia 2025 ត្រៀមតំណាងប្រទេសកម្ពុជាប្រកួតលើឆាកអន្តរជាតិក្នុងឆ្នាំ ២០២៥ នេះទៀតផង។

រីឯកញ្ញា ប៊ី សុធារី ម្ចាស់ជ័យលាភីលំដាប់រង MCC 2025 ក៏កំពុងក្ដោបបានទីផ្សារការងារខ្លាំងលើឆាកអន្តរជាតិផ្សេងៗនៅក្រៅប្រទេស ខណៈបានឃើញនាងត្រូវបានអញ្ជើញចូលរួមកម្មវិធីអន្តរជាតិក្នុងនាមបវរកញ្ញាលំដាប់រង MCC លើឆាកបង្ហាញម៉ូដនៅប្រទេសវៀតណាមជាបន្តបន្ទាបផងដែរ៕