បើគិតមកដល់ពេលនេះ រយៈពេលប្រមាណជាជាង ៣ ទសវត្សរ៍មកហើយ ដែលពិធីការិនីជើងចាស់ គង់ សុជាតិ បានឈរតំណែងជាពិធីការិនីមានប្រជាប្រិយភាពយ៉ាងរឹងមាំក្នុងវិថីសិល្បៈ។ ក្នុងនោះ បើទោះជាមានសិស្សប្អូនជំនាន់ក្រោយបានរីកដុះដាល សុទ្ធតែមានសមត្ថភាព និង វ័យក្មេងក៏ពិតមែន ប៉ុន្តែទីផ្សាររបស់ គង់ សុជាតិ គឺមិនរយាលទៅណាឡើយ។
ជាការពិតណាស់ ដូចពាក្យចាស់ពោលថា «ខ្ញីចាស់កាន់តែហិរ» ពិតជាមិនខុសនោះឡើយ ពោលគឺអ្នកនាង គង់ សុជាតិ នៅក្នុងឆ្នាំ ២០២៥ នេះ មានវ័យ ៤៩ ឆ្នាំហើយ ប៉ុន្តែសមត្ថភាពក្នុងវិថីសិល្បៈរបស់អ្នកនាង កាន់តែខ្លាំងឡើងៗ រហូតធ្វើឱ្យពិធីការិនីជំនាន់ក្រោយយកអ្នកនាងជាគំរូទៀតផង។
លើសពីនោះ មិនថាតែសមត្ថភាព និង ការងារសិល្បៈ ដែលមិនអាចមានអ្នកណាមកបំបាក់បាននោះ សូម្បីតែរូបសម្រស់របស់អ្នកម៉ាក់កូន ៣ ដែលមានវ័យជិត ៥០ ឆ្នាំរូបនេះ ក៏នៅតែក្មេងជាវ័យ ស្រស់សោភា មិនចាញ់ប្អូនៗ ក្មួយៗស្រករក្រោយក្នុងវិថីសិល្បៈ រហូតធ្វើឱ្យមហាជនសរសើរមិនដាច់ពីមាត់៕
