ភ្ជាប់ពាក្យសម័យឌីជីថល! កូនក្រមុំនៅខ្មែរ កូនកំលោះនៅអាមេរិក ឱ្យចាស់ទុំចូលស្ដីតាមប្រពៃណី បំពាក់ចិញ្ចៀនភ្ជាប់ពាក្យតាមអនឡាញ

ពិតជាគួរឱ្យច្រណែន បើទោះនៅឆ្ងាយពីគ្នាចម្ងាយម៉ឺនគីឡូ តែគូស្នេហ៍មួយគូនៅតែអាចតស៊ូ ស្រលាញ់គ្នារហូតឈានដល់ថ្ងៃភ្ជាប់ពាក្យ។ អ្វីដែលគួរឱ្យសរសើរបំផុត កូនកំលោះបានឱ្យចាស់ទុំរៀបចំពិធីចូលស្តីនារីគូដណ្តឹងទៅតាមប្រពៃណី ខណៈខ្លួនបង្ហាញមុខជាកូនកំលោះបំពាក់ចិញ្ចៀនតាមប្រព័ន្ធអនឡាញ។

ជាក់ស្តែង តាមរយៈគណនី TikTok របស់ខាងស្រីឈ្មោះ li_oney29 នាងបានបង្ហោះរូបភាពជាច្រើនសន្លឹក បង្ហាញពីពិធីភ្ជាប់ពាក្យ ដែលមានចាស់ទុំ និង សាច់ញាតិចូលស្តីដណ្ដឹងត្រឹមត្រូវ។ ចំណែកឯខាងប្រុសជាគូដណ្តឹង ក៏បានបង្ហាញមុខតាមកញ្ចក់ទូរទស្សន៍ ស្លៀកពាក់ជាកូនកំលោះ ភ្ជាប់ពាក្យបំពាក់ចិញ្ចៀនតាមអនឡាញផងដែរ។ ជាការពិត កូនកំលោះកំពុងរស់នៅអាមេរិក លោកបានធ្វើកម្មវិធីភ្ជាប់ពាក្យតាមអនឡាញជាមួយនារីគូដណ្តឹង ដែលនាងកំពុងរស់នៅស្រុកខ្មែរ។​

គណនី TikTok ខាងលើ ថែមទាំងសរសេរពាក្យពេចន៍ដ៏មានន័យថា «ភាពច្បាស់លាស់មួយនេះបានបញ្ជាក់ថា ចម្ងាយនៅតែមិនមែនជាឧបសគ្គសម្រាប់ពួកយើង»។ បើតាមរូបភាពក្នុងពិធី កូនប្រុសនាម នន្នរី មុនីរាជ ចំណែក កូនស្រីនាម គង់ ដាវ៉ាន់លីអនណេ។ អ្នកទាំងពីរទើបភ្ជាប់ពាក្យថ្មីៗ កាលពីថ្ងៃទី ៨ ខែ មីនា ឆ្នាំ ២០២៥ នេះ៕

ចុចទីនេះដើម្បីទស្សនាវីដេអូ