គិតមកដល់ពេលនេះ រយៈពេលប្រមាណជិត ៣ ឆ្នាំមកហើយ ដែលតារាចម្រៀងប្រុសស្រី ប៉ាច គីមមួយ និង លោក សយ រតនៈ បានប្ដូរពីសង្សារទៅជាគូដណ្ដឹង ដែលរៀបចំកម្មវិធីភ្ជាប់ពាក្យយ៉ាងធំជួបជុំបងប្អូន មិត្តភក្តិ កាលពីដើមខែ កក្កដា ឆ្នាំ ២០២២ កន្លងទៅ។
ក្រោយពីមានឈ្មោះជាគូដណ្ដឹងប៉ុន្មានឆ្នាំមកនេះ ប៉ាច គីមមួយ និង លោក សយ រតនៈ បានចាប់ដៃគ្នារៀបចំជីវិតគូសម្រាប់ថ្ងៃអនាគត ដែលធ្វើការរកស៊ីកាន់កាប់មុខជំនួញជាមួយគ្នា និង បន្តស្វែងយល់ចិត្តគ្នា ខណៈមហាជនកំពុងរង់ចាំអ្នកទាំងពីរ ប្រកាសពេលវេលាល្អចូលរោងការសាងគ្រួសារ។
យ៉ាងណាមិញ មួយរយៈក្រោយនេះ គូដណ្ដឹងមួយគូនេះ បានធ្វើឱ្យមហាជនចាប់អារម្មណ៍ និង រំភើបជំនួស ខណៈអ្នកទាំងពីរហាក់ចង់បង្ហើបទាក់ទងនឹងដំណឹងល្អនៃថ្ងៃពិសេស ដែលឃើញសកម្មភាពអ្នកទាំងពីរថតរូបជាគូ និង ដឹកដៃគ្នាទៅពិនិត្យសុខភាពបែបលក្ខណៈគូស្នេហ៍ត្រៀមរៀបការទៀតផង។
ដោយឡែក ថ្មីៗនេះ កញ្ញា ប៉ាច គីមមួយ និង លោក សយ រតនៈ កាន់តែធ្វើឱ្យអ្នកគាំទ្រចាប់អារម្មណ៍ពីដំណឹងរៀបការ ខណៈបានឃើញខាងប្រុសបង្ហោះរូបភាពជាគូជាមួយគូដណ្ដឹងរូបស្រស់ក្នុងពិធីមង្គល រួចនិយាយបង្ហាញពីបំណងក្នុងថ្ងៃខួបកំណើតឆ្នាំនេះ លោកចង់បានតែអូន ដែលហាក់មានន័យចង់ឱ្យខាងស្រីក្លាយជាកូនក្រមុំក្នុងជ័យរបស់លោកក្នុងឆ្នាំនេះផងដែរ។ រីឯខាងស្រីវិញ គឹកញ្ញា ប៉ាច គីមមួយ ក៏បានចែករំលែកការបង្ហោះរបស់គូដណ្ដឹងរូបសង្ហា ភ្ជាប់ជាមួយសាររៀបរាប់ថា ៖ «ខាងប្រុសខ្ញុំ ដូចរំអុកដល់ហើយ»៕
