បើគិតមកដល់ពេលនេះ រយៈពេលប្រមាណជិត ២ ឆ្នាំ មកហើយ ដែលតារាចម្រៀង ពេជ្រ សោភា និង តារាសម្តែង ឆឹម សក្កដា បានដឹកដៃគ្នាភ្ជាប់ពាក្យកាលពីថ្ងៃទី ១១ ខែវិច្ឆិកា ឆ្នាំ ២០២២ កន្លងទៅ។ ក្នុងនោះ ក្រោយពីភ្ជាប់ពាក្យហើយ តារាប្រុសស្រីទាំង ២ រូបនេះ ក៏មិនដែលបង្ហើបពីថ្ងៃចូលរោងការដែរ ដោយម្នាក់ៗសម្រុកបំពេញការងាររៀងៗខ្លួន។
យ៉ាងណាមិញ ថ្មីៗនេះ អ្នកលេងបណ្តាញសង្គមហ្វេសប៊ុក បាន និង កំពុងចាប់អារម្មណ៍នូវសារមួយ ដែលអ្នកនាង ពេជ្រ សោភា បានសរសេរអមនូវរូបភាពមួយសន្លឹក ដោយចង់បញ្ជាក់ថាខ្លួននៅទំនេរ។ ក្នុងនោះ សារភ្ជាប់នឹងរូបភាពមួយសន្លឹកនោះ អ្នកនាង ពេជ្រ សោភា បានរៀបរាប់ថា៖ «ឃើញរាងចឹងមុខចឹង អត់ទាន់មានសង្សារទេ»។
ម្យ៉ាងវិញទៀត អ្វីដែលកាន់តែធ្វើឱ្យអ្នកគាំទ្រស្រពេចស្រពិលនឹងទំនាក់ទំនងរបស់អ្នកនាងនោះ ដោយកាលពីថ្ងៃទី ២៤ ខែកញ្ញា ឆ្នាំ ២០២៥ កន្លងទៅ អ្នកនាង ពេជ្រ សោភា បានបង្ហោះសារមួយរៀបរាប់ពីមនុស្សប្រុសថា៖ «មនុស្សប្រុសខ្លះ ទោះប្រពន្ធស្អាតយ៉ាងណា ល្អយ៉ាងណា ក៏តែក្បត់នាង ព្រោះពាក្យថាមិនគ្រប់គ្រាន់ ចូលចិត្តប្រើរបស់រួមជាមួយគេណាស់ មិនខ្ពើមទេហី (មានស្រីដល់ថ្ងៃស្លាប់)»។
យ៉ាងណាក៏ដោយ បើទោះសារនោះ បានបង្ហោះឡើងធ្វើឱ្យអ្នកគាំទ្របានចូលទៅបញ្ចេញមតិ និង ស្រពិចស្រពិលយ៉ាងណាក្ដី ប៉ុន្តែមហាជនមួយចំនួន ក៏យល់ថា នោះគ្រាន់តែជាសារទូទៅ ឬអាចជាអត្ថន័យចេញពីបទចម្រៀងក៏ថាបាន៕
