ពិតណាស់ រយៈពេលជាង ៥ ខែហើយ ដែលបវរកញ្ញា រឿន ណាត និង បុរសឯកលោក លាង វេងហួរ បានប្ដូរឈ្មោះពីគូស្នេហ៍ទៅជាគូដណ្ដឹងពេញមុខ ដែលបានរៀបចំកម្មវិធីភ្ជាប់ពាក្យតាមប្រពៃណីយ៉ាងធំដំកាលពីចុងខែធ្នូ ឆ្នាំ ២០២៤ កន្លងទៅ។
ក្រោយពីបានរៀបចំកម្មវិធីភ្ជាប់ពាក្យក្លាយជាគូដណ្ដឹងនឹងគ្នាប៉ុន្មានខែមកនេះ ឃើញសង្កេតថាបវរកញ្ញា និង បុរសឯកមួយគូនេះ ហាក់ស្ងប់ស្ងាត់ខ្លាំងមិនឃើញបង្ហាញសកម្មភាពការងារសិល្បៈ និង វិស័យបវរកញ្ញាដូចពីមុនឡើយ ដោយឃើញអ្នកទាំងពីរកំពុងសំងំសាងក្ដីសុខក្នុងជីវិតគូរបស់អ្នកទាំងពីរ។
ស្របពេលនោះដែរ ក្រឡេកមើលបណ្ដាញសង្គមរបស់គូដណ្ដឹងមួយគូនេះ ភាគច្រើនឃើញបង្ហាញសកម្មភាពនៅតែក្រៅប្រទេស គឺនៅឯសហរដ្ឋអាមេរិក ដែលបានដឹកដៃគ្នាទៅដើរលេងកម្សាន្តសាងក្ដីសុខយ៉ាងផ្អែមល្ហែមទៅនោះ។
ដោយឡែក ក្រោយបង្ហាញសកម្មភាពរស់នៅលើទឹកដីសហរដ្ឋអាមេរិកមួយរយៈ ថ្មីៗនេះ បវរកញ្ញា រឿង ណាត និង លោក លាង វេងហួរ បានធ្វើឱ្យអ្នកគាំទ្រផ្ទុះចាប់អារម្មណ៍ និង ចូលរួមអបអរ ខណៈស្ងាត់ៗបានឃើញអ្នកទាំងពីរបង្ហាញរូបភាពរៀបការបែបបស្ចឹមប្រទេសយ៉ាងសាមញ្ញនៅសហរដ្ឋអាមរិក កាលពីថ្ងៃទី ៩ ខែឧសភា ឆ្នាំ ២០២៥ កន្លងទៅ ដែលមានវត្តមានបងប្អូន មិត្តភក្តិចូលរួមអបអរថ្ងៃមង្គលតែប៉ុន្មាននាក់ប៉ុណ្ណោះ៕
