តារាចម្រៀងរ៉េប Kingchi ត្រូវបានគេចាត់ទុកជាសិល្បកររៀមច្បងផ្នែកចម្រៀងរ៉េបមួយរូប ដែលពោរពេញដោយបទពិសោធ មានទេពកោសល្យ និង ទទួលបានការគោរពស្រឡាញ់ពីរៀមច្បង ព្រមទាំងសិស្សប្អូនជំនាន់ក្រោយៗជាច្រើន។ តាមរយៈសមត្ថភាពទាំងអស់នេះហើយ ធ្វើឱ្យ Kingchi ទទួលបានតំណែងជាគ្រូបង្វឹកក្នុងកម្មវិធីប្រឡងរ៉េប The Rapper Cambodia និង Rapper Fighter រដូវកាលទី ១។
ងាកមកជីវិតឯកជនវិញ តារារ៉េបពូកែលេងពាក្យជួនរូបនេះ មានជីវិតគ្រួសារពោរពេញដោយសុភមង្គល ដោយលោកបានរៀបការជាមួយភរិយាជានារីពូកែម្នាក់ ព្រមទាំងទទួលបានកូន ២ នាក់ជាចំណងដៃ។ ជារឿយៗ Kingchi និង ភរិយាបណ្ដូលចិត្ត តែងបង្ហាញរូបថតជុំគ្រួសារនៅលើបណ្ដាញសង្គមហ្វេសប៊ុក ស្ដែងពីការមើលថែយ៉ាងយកចិត្តទុកដាក់ចំពោះគ្នា ធ្វើឱ្យទំនាក់ទំនងរវាងប្ដីប្រពន្ធ និង កូនៗមានភាពស្និទ្ធស្នាល។
ជាការពិតណាស់ បើគិតមកដល់ពេលនេះ តារាចម្រៀងរ៉េប KingChi និង ភរិយា គឺអ្នកនាង ម៉ាណូឡែន បានរៀបការសាងគ្រួសារបានប្រមាណជិត ៨ ឆ្នាំ មកហើយដែរ ប៉ុន្តែ ថ្មីៗនេះ អ្នកគាំទ្របានចាប់អារម្មណ៍ និង កាន់តែផ្ទុះការសរសើរពីចំណងស្នេហ៍របស់តារាចម្រៀងរ៉េបរូបនេះទៀត ខណៈភរិយាលោក KingChi បានបង្ហោះរូបថត ២ សន្លឹកជាមួយគ្នានឹងស្វាមី ដោយរូបទី ១ គឺជារូបភាពស្គាល់គ្នាបាន ១ ឆ្នាំ និង រូបភាពទី ២ ជារូបភាពស្គាល់គ្នារយៈពេល ១៥ ឆ្នាំ។
ក្នុងនោះ អ្នកគាំទ្រលើកឡើងថា បើទោះជារៀបការប្រមាណទើបតែជិត ៨ ឆ្នាំ មែន ប៉ុន្តែចំណងស្នេហ៍របស់ KingChi និង ភរិយា គឺមានរយៈពេល ១៥ ឆ្នាំ មកហើយ ហើយបើតាមការសង្កេតពីអ្នកគាំទ្រគេកត់សម្គាល់ឃើញថា តារារ៉េបរូបនេះ នៅរក្សាបេះដូងស្មោះត្រង់ គោរព ផ្ដល់តម្លៃចំពោះភរិយាដូចកាលពីស្រឡាញ់គ្នាដំបូងៗ៕
