ធ្មេចបើកៗ រយៈពេល ១ ឆ្នាំ មកហើយ ដែលតារាចម្រៀងសមាជិកក្រុមក្មេងខ្មែរ លោក ជា សុជាតិ និង ភរិយា បានដឹកដៃគ្នាចូលរោងការតាមប្រពៃណីកាលពីថ្ងៃទី ២៥ ខែមេសា ឆ្នាំ ២០២៤ កន្លងទៅ។ ក្រោយពីសាងចំណងអាពាហ៍ពិពាហ៍ លោក ជា សុជាតិ និង ភរិយា អ្នកនាង រឹម លក្ស្មី ក៏ទទួលបានចំណងដៃកូនប្រុសមួយរូប ដែលតំណក់ឈាមដំបូងរបស់ពួកគេមានអាយុជាង ២ ខែហើយ។
ជាការពិត បើទោះជាធ្លាប់រងព្យុះភ្លៀងពាក្យសម្តី និងការរិះគន់លើរូបសម្រស់អ្នកនាង រឹម លក្ស្មី ពីបុគ្គលមួយចំនួនតូចក៏ពិតមែន តែគូស្វាមីភរិយាមួយគូនេះ ក៏ត្រូវបានមហាជនជាច្រើន សរសើរពីទំហំនៃក្តីស្រឡាញ់ ការមើលថែ និង យកចិត្តទុក្ខដាក់គ្នារបស់អ្នកទាំង ២ តាំងពីឈ្មោះជាសង្សារ ប្រែជាគូដណ្តឹង និង ក្លាយជាស្វាមីភរិយាដូចសព្វថ្ងៃ។ ក្នុងនោះ មានអ្នកគាំទ្រជាច្រើនតែងចូលទៅបញ្ចេញមតិលួចច្រណែននឹងអ្នកនាង លក្ម្សី ដែលមានស្វាមីល្អ ស្រឡាញ់នាង គឺជានាង និង ការពារនាងថែមទៀតផង។
យ៉ាងណាមិញ ថ្មីៗនេះ អ្នកនាង លក្ម្សី បានបង្ហោះសារមួយនៅលើផេកហ្វេសប៊ុកផ្លូវការរបស់ខ្លួន ថាកាលនៅពីក្មេងធ្លាប់មានគ្រូទាយថា អ្នកនាង ជាមនុស្សមានសំណាង ប៉ុន្តែអ្នកនាងមិនជឿ ព្រោះខំប្រឹងធ្វើការរកលុយខ្លួនឯង តែរហូតមានស្វាមីទើបនាងជឿ។
ក្នុងនោះ អ្នកនាង លក្ស្មី រៀបរាប់ថា៖ «ពីក្មេងម៉ាក់ខ្ញុំមើលគ្រូទាយ គ្រូទាយមួយណាក៏និយាយថាកូនហ្នឹងវាសនាគេសំណាងណាស់! ខ្ញុំអត់ដែលជឿទេ ព្រោះពីក្មេងមកខំរៀន ខំធ្វើការគ្រប់យ៉ាង ខំរកលុយរស់នៅដោយខ្លួនឯង រហូតដល់បានជួបគាត់ទើបខ្ញុំជឿសម្តីរបស់គ្រូទាយថាខ្ញុំពិតជាសំណាងមែន»៕
