ថ្មីៗនេះ មហាជននៅតាមបណ្តាញសង្គមក្នុងប្រទេសថៃ កំពុងមានការសោកស្តាយជាខ្លាំងនូវការបាត់បង់ជីវិតរបស់តារា TikTok ក៏ដូចជាអ្នកលក់អនឡាញវិញក្មេងម្នាក់ ដោយសារតែការខំរកស៊ីខ្លាំងពេក មិនបានគិតគូរពីសុខភាពខ្លួនឯងដិតដល់។
តាមព័ត៌មានបានឱ្យដឹងថា តារា TikTok និង អ្នកលក់អនឡាញរូបនេះមានឈ្មោះថា Yui នាងរកស៊ីឡាយលក់អីវ៉ាន់ជាច្រើននៅលើបណ្តាញ TikTok ជាប្រចាំ ដោយមិនសូវបានសម្រាកឱ្យគ្រប់គ្រាន់ប៉ុន្មានឡើយ។ លុះមកដល់ខែធ្នូ ឆ្នាំ ២០២៤ កន្លងទៅ នាងក៏ចាប់ផ្តើមធ្លាក់ខ្លួនឈឺ រួចក៏បានទៅមន្ទីរពេទ្យ និង ពិនិត្យឃើញថានាងមានជំងឺរលាកកូនកណ្តុរ។
យ៉ាងណាមិញ ខាងគ្រូពេទ្យបានព្យាយាមព្យាបាល តែអកុសលនាងមានប្រតិកម្មយ៉ាងខ្លាំងជាមួយនឹងថ្នាំដែលគ្រូពេទ្យបានឱ្យ ដែលធ្វើឱ្យរលាកទៅដល់សួតយ៉ាងធ្ងន់ធ្ងរ ហើយក៏បានធ្លាក់ខ្លួនដេកនឹងកន្ទេលឈឺចាប់នៅមន្ទីរពេទ្យប្រមាណជាពីរខែ ទើបបាត់បង់ជីវិតកាលពីថ្ងៃទី ២៦ ខែកុម្ភៈ ឆ្នាំ ២០២៥ កន្លងទៅនេះ ដែលធ្វើឱ្យក្រុមគ្រួសារ និង មហាជនមានសោកស្តាយ និង ស្រណោះដល់រូបនាងយ៉ាងខ្លាំង៕
ប្រភព៖ Kapook
