មហាជនអ្នកប្រើប្រាស់បណ្ដាញសង្គម បាននាំគ្នាសម្ដែងក្ដីសោកស្ដាយ និង ចូលរួមរំលែកទុក្ខ ទាក់ទិនទៅនឹងករណីមរណភាពរបស់កុមារីមួយរូបរស់នៅក្នុងខណ្ឌព្រែកព្នៅ បានបាត់បង់ជីវិត បន្ទាប់ពីបានផឹកទឹកថ្នាំបណ្ដេញមូស។
ទាក់ទិនទៅនឹងករណីដ៏សោកសង្រេងនេះ នៅព្រឹកថ្ងៃទី ១៥ ខែកក្កដា ឆ្នាំ ២០២៥ នេះ រដ្ឋបាលសង្កាត់ពន្សាំង បានជូនជាដំណឹងឱ្យបានដឹងថា មានករណីកុមារីមួយរូបបានបាត់បង់ជីវិត នៅក្នុងភូមិសាស្ត្រ ភូមិឧសភា សង្កាត់ពន្សាំង ខណ្ឌព្រែកព្នៅ រាជធានីភ្នំពេញ ខណៈបើតាមការអះអាងរបស់ម្តាយកុមាររងគ្រោះ គឺកុមាររូបនេះបានផឹកទឹកថ្នាំមូស ទើបបណ្តាលឱ្យពុលបាត់បង់ជីវិត ដោយគ្រូពេទ្យមិនអាចជួយសង្គ្រោះបាននោះឡើយ។
ចំពោះករណីនេះ រដ្ឋបាលសង្កាត់ បានចូលរួមសោកស្តាយ ព្រមទាំងបានស្នើសុំមេភូមិគ្រប់ភូមិ ជួយផ្សព្វផ្សាយដល់ប្រជាជន ឱ្យប្រុងប្រយ័ត្នកុំឱ្យករណីបែបនេះកើតមានទៀត ខណៈនេះជាមេរៀនសម្រាប់ឪពុកម្ដាយ និង អាណាព្យាបាលដែលមានកូនតូចៗ គប្បីឱ្យពួកគេនៅឱ្យឆ្ងាយពីឧបករណ៍ប្រភេទនេះ ចៀសវាងកើតឡើងនូវករណីដូចខាងលើនេះ៕
