នៅព្រឹកថ្ងៃទី ១៣ ខែមិថុនា ឆ្នាំ ២០២៥ នេះ ក្រុមការងារព័ត៌មាន និង ប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានជូនដំណឹងឱ្យបានដឹងថា នៅវេលាម៉ោង ៥ និង ៥ នាទីព្រឹក ថ្ងៃទី ១៣ ខែមិថុនា ឆ្នាំ ២០២៥ មានករណីអគ្គិភ័យមួយកន្លែង កើតឡើងនៅចំណុចផ្លូវបេតុង ភូមិជ្រៃកោង សង្កាត់ចោមចៅទី ២ ខណ្ឌពោធិ៍សែនជ័យ រាជធានីភ្នំពេញ។
ក្នុងករណីនេះ បានបណ្ដាលឱ្យមនុស្ស ៤ នាក់បានស្លាប់បាត់បង់ជីវិត គឺឪពុកម្តាយ ២ នាក់ និង កូនស្រីតូច ២ នាក់ នៅទីតាំងផ្ទះម្ចាស់ដែលមានឈ្មោះ ហេង សុវណ្ណខយ ភេទប្រុស អាយុ ៣៥ ឆ្នាំ ជនជាតិខ្មែរ មានមុខរបរជាជាងជួសជុលម៉ាស៊ីនត្រជាក់ បណ្ដាលឱ្យខូចខាតសម្ភារអស់ទាំងស្រុង និង ពុំបណ្តាលឱ្យឆេះរាលដាលដល់ផ្ទះអ្នកក្បែរខាងឡើយ។
ចំពោះមូលហេតុ គឺសមត្ថកិច្ចជំនាញកំពុងស្រាវជ្រាវ ខណៈប្រតិបត្តិការនេះ ប្រើប្រាស់រថយន្តការិយាល័យអគ្គិភ័យ ចំនួន ៥ គ្រឿង ប្រើប្រាស់ទឹកអស់ចំនួន ៤ ឡានស្មើនឹង ២២ ម៉ែត្រគូប និង រថយន្តជំនួយ រថយន្តកងពលតូចលេខ ៧០ ចំនួន ៦ គ្រឿង ប្រើប្រាស់ទឹកអស់ចំនួន ១ ឡាន ស្មើនឹង ៨ ម៉ែត្រគូប បានពន្លត់ចប់នៅម៉ោង ៦ និង ៥ នាទីព្រឹកថ្ងៃដដែល៕
