ថ្មីៗនេះ នៅប្រទេសកូរ៉េខាងត្បូង បាន និង កំពុងតែផ្ទុះករណីឃាតកម្មមួយ ដោយជនបង្កជាគ្រូបង្រៀនបានចាក់សម្លាប់សិស្សអាយុ ៨ ឆ្នាំ ហើយព្យាយាមសម្លាប់ខ្លួនឯងតាមក្រោយ ប៉ុន្តែមិនបានសម្រេច។
តាមព័ត៌មានបានឱ្យដឹងថា កាលពីថ្ងៃទី ១០ ខែកុម្ភៈ ឆ្នាំ ២០២៥ កន្លងទៅ ប៉ូលិសបានប្រទះឃើញគ្រូបង្រៀនស្រីម្នាក់ វ័យ ៤០ ឆ្នាំ និង សិស្សស្រីអាយុ ៨ ឆ្នាំម្នាក់ទៀត កំពុងតែដេកសន្លប់នៅក្នុងបន្ទប់សោតទស្សន៍ នាសាលាបឋមសិក្សាមួយកន្លែង នៅខេត្ត Daejeon។ សិស្សស្រីត្រូវបានគេបញ្ជូនទៅមន្ទីរពេទ្យ តែជាអកុសលនាងក៏បានបាត់បង់ជីវិតទៅហើយ។
តាមចម្លើយរបស់គ្រូបង្រៀនបានឱ្យដឹងថា នាងបាននាំសិស្សរូបនេះដែលរៀបចំទៅផ្ទះក្រោយគេ ចូលទៅក្នុងបន្ទប់សោតទស្សន៍របស់សាលា ហើយបានច្របាច់កគេ រួចយកកាំបិតចាក់ បន្ទាប់មកទៀតក៏បានព្យាយាមសម្លាប់ខ្លួនឯង តែមិនបានសម្រេច។
យ៉ាងណាមិញ តាមព័ត៌មានបានបញ្ជាក់ឱ្យដឹងដែរថា គ្រូបង្រៀនខាងលើនេះធ្លាប់សុំច្បាប់សម្រាក ៦ ខែ ដើម្បីព្យាបាលជំងឺផ្លូវចិត្ត តែឈប់បានតែ ២០ ថ្ងៃក៏ចូលមកបង្រៀនវិញ ហើយកាលពីថ្ងៃទី ៦ ខែកុម្ភៈ ឆ្នាំ ២០២៥ កន្លងទៅ នាងបានបំផ្លាញគ្រឿងប្រើប្រាស់របស់សាលា និង ឈ្លោះគ្នាជាមួយមិត្តរួមការងារទៀតផង៕
ប្រភព៖ Sanook
