គិតត្រឹមថ្ងៃទី ០៤ ខែមេសា ឆ្នាំ ២០២៥ នេះ គឺសល់ពេលប្រមាណត្រឹម ១០ ថ្ងៃទៀតប៉ុណ្ណោះ នឹងឈានចូលដល់បុណ្យចូលឆ្នាំថ្មីប្រពៃណីជាតិខ្មែរ ឆ្នាំម្សាញ់ សប្តស័ក ពុទ្ធសករាជ ២៥៦៩ ដែលនឹងចូលមកដល់នៅវេលាទៀបភ្លឺ ថ្ងៃច័ន្ទ ២ រោច ខែចេត្រ ត្រូវនឹងថ្ងៃទី ១៤ ខែមេសា គ្រឹស្តសករាជ ២០២៥ វេលាម៉ោង ០៤ និង ៤៨ នាទីទៀបភ្លឺ ខណៈតាមទីអារាម និង ទីសាធារណមួយចំនួន តាមបណ្ដាក្រុងខេត្ត បានរៀបចំតុបតែងរួចរាល់ ដើម្បីត្រៀមទទួលការជួបជុំឆ្នាំថ្មី។
ទន្ទឹមទៅនឹងការរៀបចំតុបតែងទីវត្តអារាម ក្នុងឱកាសបុណ្យឆ្នាំថ្មីប្រពៃណីជាតិខ្មែរនេះដែរ តាមរយៈព្រះបញ្ញាមុនីញាណ ហាក់ សៀងហៃ បានមានសង្ឃដីកាតាមរយៈការបង្ហោះលើគណនីផេកផ្លូវការថា ៖ «ការតែងលម្អតាមវត្តអារាមត្រៀមចូលឆ្នាំជារឿងល្អប្រពៃ តែលម្អដោយគ្រឿងនេសាទមានទ្រូ ឈ្នាង អង្រុត ជាដើម ដូចមិនទំនងក្នុងទីអារាមទេ»។
គួរឱ្យដឹងផងដែរថា ព្រះបញ្ញាមុនីញាណ ហាក់ សៀងហៃ ជាព្រះសង្ឃមួយអង្គក្នុងចំណោមព្រះសង្ឃដែលមានប្រជាប្រិយភាព ទទួលបានការគោរពស្រឡាញ់ប្រណិប័តន៍ ពីពុទ្ធបរិស័ទជាច្រើន ដោយព្រះអង្គតែងចែករំលែកចំណេះដឹងផ្នែកអក្សរសាស្ត្រខ្មែរដល់មហាជន រហូតទទួលបានការតែងតាំងជាទីប្រឹក្សាក្រុមប្រឹក្សាជាតិភាសាខ្មែរនៃរាជបណ្ឌិត្យ សភាកម្ពុជា៕
