តាមពិតទៅលោក ស៊ុនធិ លីមថងគុណ ជាអតីតមេដឹកនាំអាវលឿង ដែលតែងចិញ្ចឹមចិត្តចង់លេបត្របាក់ទឹកដីកម្ពុជា ធ្លាប់បានឆ្លងកាត់បទពិសោធគួរឱ្យរន្ធត់ម្តងរួចទៅហើយនៅក្នុងវិស័យនយោបាយក្នុងប្រទេសខ្លួន ដោយធ្លាប់ត្រូវគេលបបាញ់ប្រហារប៊ិះនឹងអស់ជីវិតកាលពី ១៦ ឆ្នាំមុន។
តាមព័ត៌មានបានឱ្យដឹងថា កាលពីថ្ងៃទី ១៧ ខែមេសា ឆ្នាំ ២០០៩ កន្លងទៅនេះលោក ស៊ុនធិ ត្រូវបានជនដៃដល់បានលបបាញ់ប្រហារ នៅកណ្តាលទីក្រុងបាងកក ខណៈកំពុងធ្វើដំណើរតាមរយៈរថយន្តទៅកម្មវិធីទូរទស្សន៍មួយ។ ក្នុងនោះ ជនដៃដល់បានជិះឡានមួយបាំងកន្លះចំនួន ២ គ្រឿង ហើយបានធ្វើការបាញ់រះទៅលើឡានរបស់ ស៊ុនធិ ដោយប្រើកាំភ្លើងជាច្រើនប្រភេទ រួមមាន AK47 M16 HK និង M79 ដែលសរុបទាំងអស់ ៨៩ គ្រាប់ រួចក៏នាំគ្នាគេចខ្លួនបាត់ទៅ។
យ៉ាងណាមិញ ពិតជាមិនគួរឱ្យជឿឡើយថាលោក ស៊ុនធិ នៅមានជីវិតរស់ ដោយក្នុងនោះរូបគេត្រូវគ្រាប់ចំសៀតផ្កាស្តាំមួយគ្រាប់ និង ត្រូវកម្ទេចគ្រាប់ជាច្រើនទៀតរបួសពេញខ្លួន ហើយក៏ត្រូវបានគ្រូពេទ្យវះកាត់ជួយជីវិត។ រីឯអ្នកបើកបររបស់ ស៊ុនធិ និង អ្នកដើរតាមបានត្រូវរបួសធ្ងន់។ ដោយឡែក មានជនសង្ស័យ ៣ នាក់ត្រូវបានគេចាប់ខ្លួន ដែលសុទ្ធតែជាមន្រ្តីយោធា និង ប៉ូលិសមកពីកងកម្លាំងពិសេស ហើយមកទល់ពេលនេះរឿងក្តីមិនបានដំណើរទៅមុខ និង មេក្លោងជាអ្នកបញ្ជាក៏នៅតែទាន់រកមុខឃើញ៕
ប្រភព៖ MGRONLINE
