ជាការពិតណាស់ មហាជនតាមដាននូវរឿងរ៉ាវដ៏សោកសៅរបស់តារាស្រី ពេជ្រ ចរណៃ ដោយត្រូវបានភ្លើងឆាបឆេះហាងទាំងស្រុង និង ខាតបង់ប្រាក់កាសអស់រាប់ម៉ឺនដុល្លារនោះ។ ក្នុងនោះ កញ្ញា ពេជ្រ ចរណៃ បានឱ្យដឹងថា ហាងថ្មី ដែលត្រៀមនឹងបើកនេះបានរៀបចំឡើងដោយក្នុងផ្ទះ ដែលនាងជួលគេ ដោយចំណាយក្នុង ១ ខែ ជាង ៣០០០ ដុល្លារ និង មានដេគ័រហាងបន្ថែមអស់រាប់ម៉ឺនដុល្លារ ជាកម្លាំងញើសឈាមរបស់នាង ព្រមទាំងមានការកម្ចីធនាគារៀបចំបន្ថែមទៀត។
លើសពីនោះ អ្វីដែលធ្វើឱ្យមហាជនកាន់តែអាណិតដល់ កញ្ញា ពេជ្រ ចរណៃ កាន់តែខ្លាំង ខណៈហាងនៃក្តីស្រមៃត្រូវបានភ្លើងឆាបឆេះអស់ហើយនោះ នាងមិនត្រឹមតែខាតបង់លើការរៀបចំហាងទាំងអស់នោះទេ នាងថែមទាំងត្រូវទទួលបន្ទុកចំណាយលុយច្រើនជាងពេលរៀបចំហាងគុណនឹង ២ ដើម្បីជួសជុលសាងសង់ផ្ទះជួលឱ្យម្ចាស់គេឡើងវិញទៀត។
យ៉ាងណាមិញ ក្រោយបានដឹងនូវរឿងរ៉ាវខាងលើហើយនោះ ក៏មានមហាជន និង មិត្តភក្តិទាំងក្នុងក្រៅ សិល្បៈជាច្រើន បានបរិច្ចាគថវិកាខ្លះៗជូនកញ្ញា ពេជ្រ ចរណៃ ផងដែរ។ ក្នុងនោះ ក្រឡេកមើលគណនីហ្វេសប៊ុករបស់ ឧកញ៉ា ហ៊ួត ជា ក៏បានបង្ហោះ ស្ម័គ្រជួយចេញថ្លៃគ្រឿងសំណង់មួយចំនួន ដល់កញ្ញា ពេជ្រ ចរណៃ ដែរ។
ឧកញ៉ា ហ៊ួត ជា បានរៀបរាប់លើហ្វេសប៊ុកផេកថា៖ «ស្តាប់ដំណើររឿង ពេជ្រ ចរណៃ ហើយលើសពីអាណិត បើអាចខ្ញុំសូមជួយចេញគ្រឿងសំណង់មានការ៉ូ ថ្នាំ ទ្វារ សម្ភារបន្ទប់ទឹក ជូនប្អូន»៕
