នៅយប់ថ្ងៃទី ២៣ ខែ តុលា ឆ្នាំ ២០២៥ ម៉ោង ២៣ និង ៤៥ នាទី មានករណីគ្រោះអគ្គិភ័យមួយបានកើតឡើង នៅផ្សារហេងឆាយលី ស្ថិតក្នុងក្រុមទី ១២ ភូមិព្រែកមហាទេព សង្កាត់ស្វាយប៉ោក្រុងបាត់ដំបង ខេត្តបាត់ដំបង ដោយបានប្រើប្រាស់រថយន្តអគ្គិភ័យពីតាមបណ្តាស្រុកចំនួន ១៣ គ្រឿង និង ប្រើប្រាស់ទឹកបាញ់ពន្លត់អស់ចំនួន ៦៨ រថយន្ត ទើបទប់ស្កាត់ការឆេះរាលដាលបន្តទៀត។
ក្នុងគ្រោះអគ្គិភ័យនេះ បានបង្កការខូចខាតអគារផ្សារទំនើបហេងឆាយលី ចំនួន ២៣ ល្វែង កម្ពស់ ០៤ ជាន់ និង លំនៅដ្ឋានមួយចំនួននៅក្បែរនោះផងដែរ ហើយរហូតដល់ព្រឹកថ្ងៃទី ២៤ ខែតុលា ឆ្នាំ ២០២៥ នេះ សមត្ថកិច្ចនៅបន្តការងារនេះនៅទីតាំងឆេះនៅឡើយ ខណៈមូលហេតុដែលបង្កឱ្យមានគ្រោះអគ្គិភ័យនេះ និង ទំហំនៃការខូចខាតទ្រព្យសម្ភារពិតប្រាកដ កំពុងស្ថិតក្នុងការស្រាវជ្រាវ។
យ៉ាងណាមិញ ចំពោះករណីនេះ មហាជនបាននាំគ្នាចូលរួមសម្ដែងក្ដីសោកស្ដាយ ចំពោះម្ចាស់ផ្សារទំនើប ដែលក្រោយជ្រាបដំណឹងនេះ លោកបានស្រែកទ្រហោយំ សោកស្តាយជាអនេក ដែលភ្លើងកំណាចឥតមេត្តា បានលេបត្របាក់យកសមិទ្ធផល ដែលលោកខិតខំតស៊ូកសាង និង លក់ដូរមកអស់រយៈពេលរាប់សិបឆ្នាំ គួរឱ្យសោកសង្រេងបំផុត៕
