ព្យាបាលនៅក្នុងស្រុកមួយរយៈ ភរិយា KingChi ត្រៀមចេញទៅព្យាបាលបន្តនៅក្រៅប្រទេស

កាលពីថ្ងៃទី ០៦ ខែឧសភា ឆ្នាំ ២០២៥ កន្លងទៅនេះ អ្នកលេងបណ្តាញសង្គមហ្វេសប៊ុក ជាពិសេស អ្នកគាំទ្រតារាចម្រៀងរ៉េប KingChi បានបង្ហាញក្តីបារម្ភយ៉ាងខ្លាំង ក្រោយពីលោកបានប្រកាសលក់ផ្ទះ និង ត្រូវការលុយបន្ទាន់ ដើម្បីព្យាបាលជំងឺភរិយា។ ក្នុងនោះ តារាចម្រៀងរ៉េប KingChi បានឱ្យដឹងថា ភរិយារបស់លោកត្រូវការវះកាត់ប្តូរក្រលៀន។

ក្រោយពីទទួលបានដំណឹងខាងលើ គេបានឃើញមហាជន អ្នកគាំទ្រ និង មិត្តសិល្បករជាច្រើន បានចូលរួមជាចំណែកមួយជួយសម្រួលដល់ KingChi ក្នុងការព្យាបាលភរិយា តាមរយៈការជូនជាថវិកាដល់លោកផងដែរ។

ដោយឡែក ក្រោយពីបានព្យាបាលជំងឺ ដោយការលាងឈាមបានមួយរយៈក្នុងប្រទេសកម្ពុជា នៅថ្ងៃទី ១៩ ខែមិថុនា ឆ្នាំ ២០២៥ នេះ ភរិយាតារាចម្រៀងរ៉េប KingChi គឺអ្នកនាង ម៉ាណូឡែន ក៏បានឱ្យដឹងថា អ្នកនាងបានប្រសើរខ្លះហើយ ហើយត្រៀមទៅព្យាបាលនៅក្រៅប្រទេសផងដែរ។

ក្នុងនោះ អ្នកនាង ម៉ាណូឡែន បានរៀបរាប់ថា៖ «ពេលនេះ សុខភាពខ្ញុំប្រសើរច្រើនហើយ តែនៅតែបន្តលាងឈាមតាមវេជ្ជបញ្ជា (១ សប្ដាហ៍ ២ ដង) ពួកយើងសម្រេចថា នឹងទៅព្យាបាលតម្រងនោមឆាប់ៗហើយបងប្អូន ត្រៀមឯកសារហើយតែត្រូវប្រើរយៈពេលយូរ ពួកយើងអរគុណអ្នកទាំងអស់គ្នាខ្លាំងណាស់ សម្រាប់ការលើកទឹកចិត្ត និង គាំទ្រកន្លងមក ស្រលាញ់អ្នកទាំងអស់គ្នាពេញបេះដូង»៕