ពេទ្យទាហានថៃម្នាក់ ត្រូវចាប់ខ្លួន ករណីបោ.កឱ្យទាហាន ២០០ នាក់ បង់លុយចាក់វ៉ាក់សាំងផ្តាសាយក្លែងក្លាយ សរុបជិត ៦ ពាន់ដុល្លារ

កាលពីថ្ងៃទី ២ ខែកញ្ញា ឆ្នាំ ២០២៥ កន្លងទៅនេះ ប៉ូលិសថៃ បានចុះទៅឃាត់ខ្លួនគ្រូពេទ្យទាហានម្នាក់ ក្រោមករណីបោកឱ្យទាហាន ២០០ នាក់ ចាក់វ៉ាក់សាំងផ្តាសាយធំក្លែងក្លាយ។

តាមព័ត៌មានបានឱ្យដឹងថា មន្រ្តីប៉ូលិសមកពីផ្នែកបង្ក្រាបឧក្រិដ្ឋកម្ម (CSD) និងគណៈកម្មាធិការជាតិប្រឆាំងអំពើពុករលួយ (NACC) របស់ថៃ បានចុះទៅចាប់ខ្លួននាយទាហានពេទ្យម្នាក់ឈ្មោះថា Jinnawat តាមដីកាចាប់ខ្លួនពីតុលាការយោធាទីក្រុងបាងកក ក្រោមការចោទប្រកាន់ពី បុគ្គលិករដ្ឋដែលប្រព្រឹត្តអំពើទុច្ចរិត។ ក្នុងនោះ តាមព័ត៌មានបានឱ្យដឹងទៀតថា កាលពីធ្វើការជាមួយវិស្វករកងកម្លាំងពិសេសថៃ/ស៊ូដង់ខាងត្បូង នាយទាហានពេទ្យរូបនេះបានបោកបញ្ឆោតឱ្យទាហានចំនួន ២០០ នាក់ ចាក់ថ្នាំបង្ការជំងឺគ្រុនផ្តាសាយតាមបញ្ជានៃគ្រូពេទ្យបេសកកម្ម ហើយបានទទួលប្រាក់សរុបជាង ៥ ៨០០ ដុល្លារ។

យ៉ាងណាមិញ បន្ទាប់ពីមានការស៊ើបអង្កេត គេបានរកឃើញថា វ៉ាក់សាំងដែលនាយពេទ្យបានចាក់ឱ្យទាហាននោះ មិនមែនជាវ៉ាក់សាំងផ្តាសាយពិតប្រាកដឡើយ វាគ្រាន់តែសារធាតុម្យ៉ាងដែលមានតម្លៃថោកប៉ុណ្ណោះ។ ដោយឡែក​ ក្រោយពីឃាត់ខ្លួនរួច នាយពេទ្យបានបដិសេធការចោទប្រកាន់ តែក៏ត្រូវបានអាជ្ញាធរបញ្ជូនតុលាការយោធា ដើម្បីចាត់ការទៅតាមផ្លូវច្បាប់៕

ប្រភព៖ Khaosod