ក្រោយកម្មវិធីប្រកួតសម្រស់ Miss Universe Cambodia 2025 បានបញ្ចប់យ៉ាងរលូត ឃើញថាលើបណ្ដាញសង្គមក្រៅពីចែករំលែកបង្ហាញការអបអរគាំទ្រដល់ម្ចាស់មកុដថ្មីនៃកម្មវិធី MUC 2០25 ឃើញថាចំពោះបេក្ខភាពជើងខ្លាំងកញ្ញា ពេជ្រ វត្តីសារ៉ាវឌ្ឍី ដែលទទួលបានលំដាប់រងទី ២ MUC 2025 ក៏កំពុងទទួលបានការចែករំលែកអបអរលើកទឹកចិត្តពីអ្នកគាំទ្រជាច្រើន និង មានការសោកស្ដាយចំពោះនាងផងដែរ ដែលមិនអាចមានឱកាសដណ្ដើមបានជ័យលាភីគ្រងមកុដក្នុងកម្មវិធីនេះ។
យ៉ាងណាក៏ដោយ ដ្បិតតែមិនមានឱកាសក្លាយជាម្ចាស់ជ័យលាភីគ្រងមកុដ Miss Universe Cambodia 2025 មែន ប៉ុន្តែកញ្ញា ពេជ្រ វត្តីសារ៉ាវឌ្ឍី ក៏ឆក់បានក្ដីស្រឡាញ់ និង សរសើរពីមហាជនទូទាំងប្រទេសចំពោះសមត្ថភាពរបស់នាង ជាពិសេសភាពលេចធ្លោក្នុងថ្ងៃប្រកួតផ្ដាច់ព្រ័ត្រនេះ ដែលបានប្រកួតប្រជែងបង្ហាញសមត្ថភាពដ៏អស្ចារ្យពីមួយវគ្គទៅមួយវគ្គ និង ទទួលបានពានរង្វាន់មួយ គឺ RADIANOE QUEEN BY POND’S។
បន្ទាប់ពីបញ្ចប់ការប្រកួតនេះដែរ ងាកមើលហ្វេសប៊ុករបស់កញ្ញា ពេជ្រ វត្តីសារ៉ាវឌ្ឍី ក៏បានឃើញនាងបង្ហោះសារបន្តបន្ទាប់បង្ហាញពីអារម្មណ៍ពិត ចំពោះលទ្ធផលរបស់នាងដែលទទួលបានទៅកាន់មហាជន ដោយនាងបានប្រឹងអស់ពីសមត្ថភាពហើយក្នុងការប្រកួតប្រជែងមួយនេះ។ លើសពីនេះ នាង ក៏បានបង្ហាញក្ដីមោទកភាពចំពោះការប្រឹងប្រែងរបស់ខ្លួន និង រីករាយចំពោះតំណែងជា លំដាប់រងទី ២ នៃ MUC 2025 ព្រមទាំងនាងតែងប្រកាន់ភ្ជាប់នូវការទទួលស្គាល់ការពិត និង អភិវឌ្ឍខ្លួនបន្ថែម ដោយចាត់ទុកថាគ្រាន់តែជាការផ្ដើមប៉ុណ្ណោះក្នុងវិស័យបវរកញ្ញាចក្រវាលនេះទៀតផង។
សារនោះ ពេជ្រ វត្តីសារ៉ាវឌ្ឍី បានបង្ហោះរៀបរាប់ថា ៖ «ការទទួលស្គាល់ការពិត ជារឿងមួយដែលនាងខ្ញុំតែងតែប្រកាន់ភ្ជាប់ ហើយយកមកអភិវឌ្ឍខ្លួនបន្ថែមជានិច្ច នេះគ្រាន់តែជាការចាប់ផ្តើមនៃចក្រវាល ហើយនាងខ្ញុំរីករាយនឹងចំណាប់ផ្តើមមួយនេះ។
ជាថ្មីម្តងទៀត នាងខ្ញុំសូមគោរពអរគុណ និង ដឹងគុណដល់បងប្អូនទាំងអស់គ្នាដែលបានរួមដំណើរមួយនេះជាមួយ ពេជ្រ វត្តី។ អរគុណពិសេសដល់អ្នកគាំទ្ររបស់នាងខ្ញុំគ្រប់ៗរូប ដែលតែងតែឈរពីក្រោយខ្នងនាងខ្ញុំ និង ជាកម្លាំងចិត្តយ៉ាងរឹងមាំរបស់នាងខ្ញុំ។ នាងខ្ញុំក៏សូមអរគុណដល់បងៗ ដែលបានចូលរួមឧបត្ថម្ភឈុត ជាងផាត់មុខ ធ្វើសក់ និង បងៗជាងថតរូបទាំងអស់ដែលបានជួយ និង ទុកចិត្តលើប្អូនកន្លងមក។ អរគុណដល់ គណកម្មការ ក្រុមការងារ និង អ្នករៀបចំការងារបវរកញ្ញាចក្រវាលកម្ពុជា។ អរគុណដល់លោកគ្រូ អ្នកគ្រូ គ្រូបង្វឹកទាំងអស់ក្នុងដំណើរប្រកួតមួយនេះ ជាថ្មីម្តងទៀត នាងខ្ញុំនៅតែមានមោទកភាព និង រីករាយបំផុតចំពោះតំណែងមួយនេះ»៕
