ថ្មីៗកន្លងទៅនេះ មហាជនអ្នកគាំទ្រវិស័យបវរកញ្ញាបានផ្ទុះការចាប់អារម្មណ៍ខ្លាំង ខណៈស្ងាត់ៗបានឃើញវត្តមានរបស់បវរកញ្ញា ២ រូប គឺកញ្ញា ពេជ្រ វត្តីសារ៉ាវឌ្ឍី និង កញ្ញា ហុក សារិតុលា ធ្វើដំណើរទៅកាន់ប្រទេសទីម័រខាងកើត ព្រមទាំងបង្ហាញរូបភាពជាមួយនឹង ឯកអគ្គរដ្ឋទូតនៃសាធារណរដ្ឋប្រជាធិបតេយ្យទីម័រខាងកើតទៀតផង។
មកដល់ថ្ងៃទី ៨ ខែឧសភា ឆ្នាំ ២០២៥ នេះ តាមរយៈការបង្ហោះវីដេអូនៃសកម្មភាពផ្សេងៗលើទឹកដីទីម័រនេះដែរ ពេជ្រ វត្តីសារ៉ាវឌ្ឍី និង ហុក សារិតុលា ក៏បានប្រាប់ឱ្យដឹងថាអ្នកទាំងពីរទៅដើម្បីតំណាងឱ្យសិល្បករកម្ពុជា ក្នុងការសម្តែងកិច្ចស្វាគមន៏ដំណើរទស្សនកិច្ចរបស់ សម្តេចអគ្គមហាសេនាបតីតេជោ ហ៊ុន សែន ទៅកាន់ប្រទេសទីម័រខាងកើត។
លើសពីនេះ ពេជ្រ វត្តីសារ៉ាវឌ្ឍី និង ហុក សារិតុលា ក៏បានបង្ហាញក្ដីរំភើបចិត្ត និង មានកិត្តិយសខ្លាំង ដែលទទួលបានឱកាសតំណាងជាសិល្បករកម្ពុជា និង បានឡើងសម្ដែងចម្រៀងដោយផ្ទាល់ក្នុងកម្មវិធីដ៏ធំនេះទៀតផង៕
