ពេជ្រ វត្តីសារ៉ាវឌ្ឍី ខ្នះខ្នែងដៃជើង ចុះខេត្តរួមចំណែកជួយរៀបចំស្បៀង និង ធ្វើនំខ្មែរត្រៀមសម្រាប់កងទ័ពជួរមុខ

ទាក់ទងនឹងសកម្មភាពសប្បុរសធម៌របស់មហាជនកម្ពុជា និង អ្នកសិល្បៈ មកដល់ពេលនេះ ដ្បិតតែស្ថានភាពប្រទេសប្រសើរវិញបន្តិច ក៏មហាជននៅតែបន្តបង្ហាញសកម្មភាពរួបរួមកម្លាំងស្មារតី ត្រៀមសម្រាប់ផ្ដល់ជំនួយដល់កងទ័ពជួរមុខ ដែលកំពុងឈរក្នុងសមរភូមិផងដែរ។

ជាក់ស្ដែង ក្រឡេកមើលហ្វេសប៊ុករបស់បវរកញ្ញា ពេជ្រ វត្តីសារ៉ាវឌ្ឍី ក៏ឃើញនាងនៅបន្តបង្ហាញសកម្មភាពសប្បុរសធម៌ ខណៈកន្លងមកនាងបានប្រើទាំងសំឡេង និង កម្លាំងស្មារតីចូលរួមជាចំណែកជួយផ្សព្វផ្សាយពីប្រទេសជាតិ ក៏ដូចជារៀបចំស្បៀងអាហារជាមួយសិល្បករដទៃ ចុះផ្ដល់ជំនួយដល់កងទ័ពជួរមុខ និង បងប្អូនភៀសសឹកជាច្រើនដែរ។

មកដល់ថ្មីៗនេះ ក៏បានឃើញសកម្មភាពរបស់កញ្ញា ពេជ្រ វត្តីសារ៉ាវឌ្ឍី និង សិល្បករជាច្រើនរូប បានរួមកម្លាំងគ្នាបន្តសកម្មភាពចុះតាមខេត្ត ដែលចូលរួមជាចំណែកជួយរៀបចំស្បៀងអាហារផ្សេងៗ និង ជួយធ្វើនំខ្មែរដោយផ្ទាល់ដៃនៅឯខេត្តកំពង់ឆ្នាំង សម្រាប់ត្រៀមយកជូនបងៗកងទ័ពជួរមុខបន្ថែមទៀត។

ក្នុងនោះ ពេជ្រ វត្តីសារ៉ាវឌ្ឍី ក៏បានបង្ហោះរៀបរាប់លើហ្វេសប៊ុកថា ៖ «ចូលរួមជាចំណែកមួយក្នុងការធ្វើនំក្រឡាន នំអន្សម និង នំខ្មែរជាច្រើន ជាជំនួយដល់បងៗកងទ័ព នៅឃុំលង្វែក ស្រុកកំពង់ត្រឡាច ខេត្តកំពង់ឆ្នាំង ស្មារតីបេះដូងខ្មែរ United as one, From baking Khmer cakes with love to supporting our soldiers and our peoples, every act of kindness carries the spirit of our nation»៕