មកដល់ពេលនេះ ជុំវិញករណីអគ្គិភ័យដែលបានឆាប់ឆេះហាងថ្មីរបស់តារាស្រី ពេជ្រ ចរណៃ កាលពីយប់ថ្ងៃទី ១៨ ខែមិថុនា ឆ្នាំ ២០២៥ កន្លងទៅ មហាជនអ្នកគាំទ្រលើបណ្ដាញសង្គមនៅតែបន្តចែករំលែកបង្ហាញការសោកស្ដាយខ្លាំងជាមួយរូបនាង ដែលហាងថ្មីនេះបានរងការខូចខាតសម្ភារទាំងស្រុង។
ទាក់ទងនឹងហាងថ្មីរបស់ ពេជ្រ ចរណៃ ដែលបានឆាប់ឆេះនេះ ត្រូវបានគេដឹងថាជាហាងដែលនាងទើបតែរៀបចំរួច និង ត្រៀមសម្ភោធដំណើរការ ដែលមានចែកជា ៣ ផ្នែក មានអាហារដ្ឋានម្ហូបកម្ម៉ង់បែបខ្មែរ កាហ្វេល្បុក្កតោខ្មែរ និង ជាកន្លែងបង្ហាត់ក្បាច់គុនបុរាណខ្មែរផងដែរ។
បើតាមរយៈការរៀបរាប់ក្នុងវីដេអូសម្ភាសរបស់ ពេជ្រ ចរណៃ បានឱ្យដឹងថាហាងថ្មីនេះនាងបានរៀបចំឡើងដោយជួលផ្ទះរបស់គេក្នុង ១ ខែជាង ៣០០០ ដុល្លារ ជាប្រភេទផ្ទះវីឡាមានតម្លៃខ្ទង់ជាង ៥០ ម៉ឺនដុល្លារ ដែលទាំងការរៀបចំផ្ទះ និង រចនាទៅជាហាងនេះដែរ គឺនាងចំណាយអស់រាប់ម៉ឺនដុល្លារ ជាកម្លាំងញើសឈាមរបស់នាង ព្រមទាំងមានការកម្ចីធនាគារៀបចំបន្ថែមទៀត។
អ្វីដែលធ្វើឱ្យមហាជនកាន់តែបង្ហាញការស្ដាយ និង អាណិតចំពោះតារាស្រីរូបនេះ បន្ទាប់ពីអគ្គិភ័យឆាប់ឆេះខូចខាតទាំងស្រុងនេះដែរ ពេជ្រ ចរណៃ មិនត្រឹមតែខាតបង់លើការរៀបចំហាងទាំងអស់នោះទេ នាងថែមទាំងត្រូវទទួលបន្ទុកចំណាយលុយច្រើនជាងពេលរៀបចំហាងគុណនឹង ២ ដើម្បីជួសជុលសាងសង់ផ្ទះជួលឱ្យម្ចាស់គេឡើងវិញទៀត ដែលពេលនេះ នាងក៏បានចេញវីដេអូសុំទោសដល់ម្ចាស់ផ្ទះ និង សុំពេលវេលាដើម្បីឱ្យនាងបានរៀបចំផ្ទះឡើងវិញតាមលទ្ធភាព។
លើសពីនេះ បើតាមរយៈការរៀបរាប់របស់កញ្ញា ពេជ្រ ចរណៃ ក្នុងកិច្ចសម្ភាសជាមួយអ្នកសារព័ត៌មានជុំវិញការខាតបង់ដោយសារអគ្គិភ័យឆាប់ឆេះនេះ បានឱ្យដឹងទៀតថា រាល់សម្ភារក្នុងហាងថ្មីដែលនាងបានរៀបចំចំណាយលុយអស់ ៤ ទៅ ៥ ម៉ឺនដុល្លារ បួករួមទាំងសម្ភារក្នុងផ្ទះរបស់ម្ចាស់ផ្ទះ ដែលមានស្រាប់ចំនួន ២០ ទៅ ២៥ ម៉ឺនដុល្លារទៀត គឺសរុបជាចំនួនត្រូវខូចខាតអស់ខ្ទង់ ៣០ ដុល្លារឯណោះ៕
