មានរឿងរ៉ាវដ៏គួរឱ្យខ្លោចចិត្តរបស់ក្មេងប្រុសជនជាតិចិនម្នាក់ ដែលរងសម្ពាធពីម្តាយទាក់ទងនឹងរឿងរៀនខ្លាំងពេក រហូតដាក់ថ្នាក់បញ្ចប់ជីវិតខ្លួនឯង ហើយផ្ញើសារដ៏ចុកចាប់ប៉ុន្មានម៉ាត់ទៅកាន់ម្តាយថែមទៀត។
តាមព័ត៌មានបានឱ្យដឹងថា ក្មេងប្រុសរូបនេះជាកូនទោលប្រចាំគ្រួសារ ដោយឪពុកម្តាយបានរកាំរកូសចែកផ្លូវគ្នា ហើយគេបានរស់នៅជាមួយនឹងម្តាយ។ ក្មេងប្រុសរូបនេះរៀននៅថ្នាក់ទី ១២ ហើយជារឿយៗគេតែងត្រូវម្តាយដាក់សម្ពាធរឿងរៀនយ៉ាងតឹងរ៉ឹងជានិច្ច។ មិនត្រឹមតែសម្ពាធលើរឿងរៀននោះទេ ម្តាយថែមទាំងដាក់សម្ពាធទៅលើការមិនឱ្យជួបនឹងឪពុកទៀតផង រហូតគេក្លាយទៅជាក្មេងបាក់ទឹកចិត្ត។
យ៉ាងណាមិញ រឿងកាន់តែធ្ងន់ធ្ងរទៅទៀត គឺនៅពេលដែលគេប្រឡងចូលមហាវិទ្យាល័យមិនជាប់។ គេត្រូវបានបង្ខំឱ្យរៀនហើយរៀនទៀត ម្តាយតែងតែឃ្លាំមើលគេគ្រប់សកម្មភាព មិនឱ្យគេធ្វើអ្វីក្រៅពីការរៀនឡើយ។ ក្មេងប្រុសរូបនេះ បានសន្សំការបាក់ទឹកចិត្តទុករាល់ថ្ងៃ រហូតដល់ថ្ងៃមួយគេត្រូវបានម្តាយស្តីបន្ទោសខ្លាំង ព្រោះតែរឿងទទួលលុយពីឪពុក លើកនេះគេក៏ដាច់ចិត្តដើរចេញពីផ្ទះ រួចទៅលោតទឹកនៅស្ពានដើម្បីបញ្ចប់ការឈឺចាប់។
អ្វីដែលគួរឱ្យរំជួលចិត្តនោះ មុននឹងលោតទឹកគេបានផ្ញើសារទៅកាន់ម្តាយថា ៖ «កូនចង់រៀនឱ្យបានល្អ កូនស្រឡាញ់ម៉ាក់ តែជាតិក្រោយម៉ាក់កុំកើតជាម៉ាក់របស់កូនទៀត កូនពិតជាហត់នឿយខ្លាំងណាស់»៕
ប្រភព៖ Sanook
