កាលពីថ្ងៃទី ១៦ ខែមិថុនា ឆ្នាំ ២០២៥ កន្លងទៅនេះ ក្រុមគ្រួសាររបស់កុមារា ឆលី បានបញ្ជូន ឆលី ទៅកាន់មន្ទីរពេទ្យនៅក្រៅប្រទេសជាថ្មីម្តងទៀត ក្រោយដុំសាច់ខួរក្បាលបានដុះឡើងមកវិញ បន្ទាប់ពីវះកាត់បានរយៈពេល ២ ខែកន្លះ។
ក្នុងនោះដែរ កាលពីព្រឹកថ្ងៃទី ១៧ ខែមិថុនា ឆ្នាំ ២០២៥ អ្នកម្តាយរបស់ ឆលី បានជម្រាបដំណឹងថា ឆលី បានទៅដល់មន្ទីរពេទ្យនាប្រទេសថៃ ដែលជាមន្ទីរពេទ្យ ឆលី ធ្លាប់ព្យាបាលពីមុនមក ដោយកំពុងតាមដានយកចិត្តទុកដាក់ពីគ្រូពេទ្យ។
យ៉ាងណាមិញ នៅថ្ងៃត្រង់នាថ្ងៃ ១៧ ខែមិថុនា ដដែល អ្នកលេងបណ្តាញសង្គមហ្វេសប៊ុក មានក្តីក្ដុកក្ដួលយ៉ាងខ្លាំង ខណៈផេកផ្លូវការរបស់ ឆលី ដែលមានលោកប៉ាជាអ្នកកាន់ បានបង្ហោះដំណឹងដ៏សោកសៅមួយ ថា ឆលី មិនអាចទទួលការព្យាបាលបន្តទៀតនោះឡើយ។
តាមរយៈផេក ឆលី បានរៀបរាប់ថា៖ «ដំណឹងដ៏អកុសលមួយ បានចេញមកពីមាត់វេជ្ជបណ្ឌិតផ្ទាល់របស់ឆលី ថា ឆលី មិនអាចបន្តការព្យាបាលបានទៀតទេ គ្រាន់តែប្រើថ្នាំ ដើម្បីរក្សាពេលវេលារស់នៅជាមួយគ្រួសារ និង បងប្អូនជនរួមជាតិខ្មែរបានមួយរយៈពេល»៕
