កាលពីថ្ងៃទី ០៦ ខែឧសភា ឆ្នាំ ២០២៥ កន្លងទៅនេះ អ្នកលេងបណ្តាញសង្គមហ្វេសប៊ុក ជាពិសេស អ្នកគាំទ្រតារាចម្រៀងរ៉េប KingChi បានបង្ហាញក្តីបារម្ភយ៉ាងខ្លាំង ក្រោយពីលោកបានប្រកាសលក់ផ្ទះ និង ត្រូវការលុយបន្ទាន់ ដើម្បីព្យាបាលជំងឺភរិយា។ ក្នុងនោះ តារាចម្រៀងរ៉េប KingChi បានឱ្យដឹងថា ភរិយារបស់លោកត្រូវការវះកាត់ប្តូរក្រលៀន។
ក្រោយពីទទួលបានដំណឹងខាងលើ គេបានឃើញមហាជន អ្នកគាំទ្រ និង មិត្តសិល្បករជាច្រើន បានចូលរួមជាចំណែកមួយជួយសម្រួលដល់ KingChi ក្នុងការព្យាបាលភរិយា តាមរយៈការជូនជាថវិកាដល់លោក។
យ៉ាងណាមិញ អ្វីដែលកំពុងតែធ្វើឱ្យមហាជន និង ក្រុមគ្រួសារតារាចម្រៀងរ៉េប KingChi ហួសចិត្តនោះ ខណៈពេលនេះ ភរិយាលោកកំពុងសម្រាកព្យាបាលជំងឺ និង ត្រូវការថវិកាស្រាប់តែមានជនខិលខូចឆ្លៀតឱកាស បន្លំគណនីធនាគារជាភរិយា KingChi គឺអ្នកនាង ម៉ាណូឡែន ក្នុងតេឡេក្រាម ដើម្បីរៃអង្គាសថវិកាពីអ្នកដទៃក្នុងគោលបំណងយកដាក់ចូលហោប៉ៅខ្លួនឯង។
ភ្លាមនោះ មិនបង្អង់ អ្នកនាង ម៉ាណូឡែន ភរិយារបស់ចម្រៀងរ៉េប KingChi បានច្រានចោល និង ជម្រាបថា៖ «គណនីនេះ មិនមែនរបស់នាងខ្ញុំទេ គឺមានជនឆ្លៀតឱកាសបន្លំ»៕
