នៅប្រទេសថៃមានករណីគ្រោះថ្នាក់ចរាចរណ៍មួយ ដែលបង្កមកពីស្រ្តីជាម្តាយ បានដាក់កូនអាយុ ២ ឆ្នាំនៅលើភ្លៅ ស្រាប់តែកូនទាញចង្កូតឡានលេង បណ្តាលឱ្យជ្រុលទៅបុកក្មេងជាបងប្អូនបង្កើត ២ នាក់ ស្លាប់នៅនឹងកន្លែង។
តាមព័ត៌មានបានឱ្យដឹងថា ហេតុការណ៍មួយនេះបានកើតឡើងកាលពីថ្ងៃទី ២២ ខែមីនា ឆ្នាំ ២០២៥ កន្លងទៅ នាខេត្តបុរីរ៉ាំ ប្រទេសថៃ។ ក្នុងនោះ ស្រ្តីជាម្តាយបានបើកឡានចេញមកជាមួយនឹងកូនប្រុស ២ នាក់ ដោយកូនប្រុសច្បងអាយុ ១២ ឆ្នាំអង្គុយនៅកៅអីខាងមុខ រីឯកូនប្រុសពៅអាយុ ២ ឆ្នាំ នាងបានដាក់ឱ្យអង្គុយនៅលើភ្លៅ។ នៅពេលដែលនាងបានងាកទៅមើលកូនប្រុសច្បង ស្រាប់តែកូនដែលអង្គុយលើភ្លៅ បានទាញចង្កូតឡានលេង ដែលបណ្តាលឱ្យជ្រុលទៅបុកម៉ូតូមួយគ្រឿង ដែលបើកបរដោយក្មេង ២ នាក់ជាបងប្អូនបង្កើតស្លាប់នៅនឹងកន្លែងគួរឱ្យអាសូរ។
តាមព័ត៌មានបានឱ្យដឹងថា បងប្អូនទាំង ២ នាក់ មានម្នាក់អាយុ ៩ ឆ្នាំ និង ម្នាក់ទៀតអាយុ ១៣ ឆ្នាំ បានបើកម៉ូតូចេញពីផ្ទះទៅទិញអីវ៉ាន់មិនទាន់បាន ៥០ ម៉ែត្រផង ក៏ស្រាប់តែត្រូវរថយន្តខាងលើជ្រុលទៅបុកបណ្តាលឱ្យស្លាប់ទាំង ២ នាក់ ដែលធ្វើឱ្យក្រុមគ្រួសាររងគ្រោះមានការសោកស្តាយជាពន់ពេក។ ដោយឡែក ស្រ្តីជាជនបង្កក៏បានរងចាំប្រគល់ខ្លួនទៅឱ្យប៉ូលិស ដើម្បីដោះស្រាយទៅតាមផ្លូវច្បាប់ផងដែរ៕
ប្រភព៖ MATICHON
