ថ្មីៗនេះ មានករណីដ៏គួរឱ្យតក់ស្លុតមួយនៅប្រទេសថៃ ដែលក្មេងស្រីអាយុ ៦ ឆ្នាំម្នាក់ ត្រូវឆ្កែ Pitbull របស់អ្នកជិតខាងមកអូសពីលើគ្រែទៅខាំ រហូតដល់របួសធ្ងន់ធ្ងរ ត្រូវសង្គ្រោះបន្ទាន់។
តាមព័ត៌មានបានឱ្យដឹងថា ហេតុការណ៍មួយនេះបានកើតនៅក្នុងខេត្តនុនថាក់បុរី ដោយផ្ទះរបស់ក្មេងស្រីរងគ្រោះនៅពីមុខផ្ទះរបស់ម្ចាស់ឆ្កែ។ នៅថ្ងៃកើតហេតុ ក្មេងស្រីរងគ្រោះបានលេងនៅលើគ្រែក្នុងផ្ទះរបស់ខ្លួន ស្រាប់តែឆ្កែ មួយក្បាលនេះ បានចូលមកអូសនាងពីលើគ្រែ រួចខាំមួយទំហឹងបណ្តាលឱ្យមានរបួសដាច់យ៉ាងធ្ងន់ធ្ងរនៅលើ ក ក្បាល និង ត្រចៀក តែជាសំណាងល្អអ្នកផ្ទះបានជួយទាន់ពេល ហើយនាងក៏ត្រូវបានអាជ្ញាធរចុះអន្តរាគមន៍មកនាំទៅសង្រ្គោះបន្ទាន់នៅឯមន្ទីរពេទ្យ។
យ៉ាងណាមិញ តាមរយៈម្ចាស់ឆ្កែបានឱ្យដឹងថា ខ្លួនចិញ្ចឹមឆ្កែមួយក្បាលនេះនៅតែក្នុងផ្ទះប៉ុណ្ណោះ វាមិនដែលខាំនរណាសោះ តែនៅថ្ងៃកើតហេតុមានអ្នកជិតខាងម្នាក់ទៀតចូលមកដងទឹកក្នុងផ្ទះខ្លួន ហើយភ្លេចបិទទ្វារវិញ ទើបធ្វើឱ្យឆ្កែចេញទៅក្រៅបាន ហើយក៏ទៅខាំក្មេងស្រីរូបនោះ។ ម្ចាស់ឆ្កែបានឱ្យដឹងថា ខ្លួនពិតជាមានការសោកស្តាយណាស់ចំពោះហេតុការណ៍នេះ ហើយក៏បានសុំទោសទៅខាងគ្រួសាររបស់ក្មេងស្រី ព្រមទាំងនឹងទទួលខុសត្រូវលើករណីនេះគ្រប់បែបយ៉ាងផងដែរ៕
ប្រភព៖ Khaosod
