ល្ខោនខោលវត្តស្វាយអណ្ដែត ត្រូវបានដាក់បញ្ចូលក្នុងបញ្ជីបេតិកភណ្ឌវប្បធម៌អរូបី នៃមនុស្សជាតិដែលតំណាងឱ្យល្ខោនខោលនៅទូទាំងប្រទេសកម្ពុជា កាលពីថ្ងៃទី ២៨ ខែវិច្ឆិកា ឆ្នាំ ២០១៨ កន្លងទៅ នឹងបង្ហាញទស្សនីយភាពនៅក្នុងមហោស្រព «បុណ្យភូមិ» សប្តាហ៍ទី ២ នាថ្ងៃទី ១១ និង ១២ មេសា ឆ្នាំ ២០២៥ នេះ នៅវត្តស្វាយអណ្តែត។
ជាការពិត ល្ខោនខោលវត្តស្វាយអណ្តែត ត្រូវបានដាក់បញ្ចូលក្នុងបញ្ជីបេតិកភណ្ឌវប្បធម៌អរូបី នៃមនុស្សជាតិដែលតំណាងឱ្យល្ខោនខោលនៅទូទាំងប្រទេសកម្ពុជា គឺពិតជាពិសេស ខណៈមហាជនកម្រនឹងបានទស្សនាដោយផ្ទាល់នូវផ្ទាំងទស្សនីយភាពនេះនៅ វត្តស្វាយអណ្តែតតែម្តង។
ក្នុងនោះដែរ នៅរាត្រីថ្ងៃទី ១១ និង ១២ ខែមេសា ឆ្នាំ ២០២៥ នេះ នឹងមានទម្រង់ល្ខោនរបស់ខ្មែរ ដែលត្រូវការការពារជាបន្ទាន់នឹងធ្វើការសម្តែងនៅក្នុងបរិវេណ វត្តស្វាយអណ្តែត នៃមហោស្រពសិល្បៈ «បុណ្យភូមិ» ឆ្នាំទី ១២ នេះ។ ទម្រង់សិល្ប: ដែលនឹងត្រូវសម្តែងនាយប់ថ្ងៃទី ១១ ខែមេសា នេះមានដូចជា «ល្ខោនបុរាណពោលស្រី វត្តកៀនស្វាយក្រៅ» ចាប់ពីវេលាម៉ោង ៦ ល្ងាច និង ថ្ងៃទី ១២ ខែ មេសា នឹងមានទម្រង់សិល្បៈ «ល្ខោនយីកេរនីពេជ ខេត្តកំពង់ធំ» និង «ល្ខោនខោលវត្តស្វាយអណ្តែត»។
សូមបញ្ជាក់ថា រយៈពេល ២ ថ្ងៃ នៃ កម្មវិធី «បុណ្យភូមិ» សប្តាហ៍ ២ នេះ ក៏មានលេងល្បែងប្រជាប្រិយខ្មែរ និង របាំប្រពៃណីចម្រុះជាច្រើន សំរាប់អ្នកស្រុកបុណ្យភូមិក្នុងការទៅកម្សាន្ត ដែលទីតាំងគឺស្ថិតនៅក្នុងបរិវេណវត្តស្វាយអណ្តែត៕
