ថ្មីៗនេះ Stefano Ricci ដែលជាម៉ាកសម្លៀកបំពាក់បុរសប្រណីតដ៏ល្បីរបស់អ៊ីតាលី ទើបបានបង្ហោះវីដេអូថ្មីមួយទៀត បង្ហាញពីខូឡិកហ្សិនប្រចាំរដូវក្តៅ ភ្ជាប់មកជាមួយបេសកកម្មរុករកដ៏អស្ចារ្យនៅលើទឹកដីអង្គរ បានកំពុងធ្វើឱ្យពិភពលោកផ្ទុះការចាប់អារម្មណ៍ជាខ្លាំង។
អមជាមួយវីដេអូផ្លូវការ នៅលើទំព័រ Instagram របស់ម៉ាក Stefano Ricci គេបានសរសេររៀបរាប់ជាអង់គ្លេស ដោយយើងបានបកប្រែជាភាសាខ្មែរថា៖ «សូមណែនាំខូឡិកហ្សិន Summer 2025 Collection ជាមួយជំពូកទី ៥ នៃអ្នករុករក Stefano Ricci: បេសកកម្មកម្ពុជា។ លើកនេះយើងធ្វើដំណើរជ្រៅទៅក្នុងព្រៃនៃអាស៊ីអាគ្នេយ៍ ដោយបង្ហាញពីប្រាសាទបុរាណ ខ្សែទឹកដ៏ភ្លឺចែងចាំង និង ប្រពៃណីដ៏ពិសិដ្ឋ។ បំផុសគំនិតដោយស្មារតីនៃវប្បធម៌ខ្មែរ ខូឡិកហ្សិនប្រាប់នូវរឿងរ៉ាវនៃការរុករក ការចង់ដឹង ចង់ឃើញ និង ភាពស្រស់ស្អាតឋិតឋេរ ដែលត្រូវបានរកឃើញ»។
ក្នុងបេសកកម្មកម្ពុជា ឬ Mission Cambodia មានការចូលរួមពីបុគ្គលសំខាន់ៗដូចជា៖ លោក Filippo Ricci នាយកច្នៃប្រឌិតនៃ Stefano Ricci S.p.A, លោក Niccolò Ricci នាយកប្រតិបត្តិនៃ Stefano Ricci S.p.A, លោក Steve McCurry អ្នកសរសេរសាច់រឿង និង ថតរូបដ៏ល្បីល្បាញ, លោក Terry D. Garcia នាយកប្រតិបត្តិ Exploration Ventures LLC និង លោក Alessandro Moggi អ្នកថតរូបក្រោយឆាក។ វីដេអូនេះបានបង្ហាញយ៉ាងច្បាស់នូវទីតាំងសំខាន់ៗលើទឹកដីខេត្តសៀមរាបដូចជា៖ ប្រាសាទបាយ័ន, ប្រាសាទបេងមាលា, ប្រាសាទព្រះខ័ន, ប្រាសាទតាព្រហ្ម រួមជាមួយសម្រស់ដៃទន្លេមេគង្គ, អង្គការអភិរក្សសត្វដំរីនៅភ្នំគូលែន Kulen Elephant Forest និង កន្លែងសម្រាកដ៏ប្រណីតលាក់ខ្លួនកណ្តាលព្រៃ Shinta Mani Wild៕
