ដំណឹងមរណភាពដ៏ក្រៀមក្រំ នៅថ្ងៃទី ១៩ ខែវិច្ឆិកា ឆ្នាំ ២០២៥ នេះ បានធ្វើឱ្យមហាជនអ្នកគាំទ្រលើបណ្ដាញសង្គម ជាពិសេសអ្នកក្នុងសិល្បៈជាច្រើន មានការសោកស្ដាយជាពន់ពេកចំពោះការបាត់បង់តារាសម្ដែងប្រុសលោក អ៊ុន សិទ្ធា ដែលបានទទួលមរណភាពដោយសារជំងឺដំបៅក្រពះ ពោះវៀនធ្ងន់ធ្ងរ និង ទឹកដក់ក្នុងពោះ។
ចំពោះការចាកចេញគ្មានថ្ងៃត្រឡប់របស់លោក អ៊ុន សិទ្ធា បានបន្សល់ត្រឹមក្ដីអាល័យក្នុងចិត្តមហាជនអ្នកគាំទ្រ ជាពិសេសមិត្តរួមសិល្បៈជាច្រើន មានតែអារម្មណ៍ស្រណោះអាណិតចំពោះតារាសម្ដែងប្រុសរូបនេះ ដែលមិត្តស្និទ្ធស្នាលក្នុងសិល្បៈជាច្រើន កំពុងចែករំលែកនូវការសោកស្ដាយ ព្រមទាំងបង្ហាញពីអនុស្សាវរីយ៍ក្នុងការចង់ចាំល្អៗជាមួយតារាប្រុសរូបនេះបន្តបន្ទាប់។
ក្នុងនោះដែរ ក៏បានឃើញហ្វេសប៊ុករបស់ពិធីការិនី សុភ័ក្រ្ត កុសុម៉ា ដែលជាមិត្តល្អម្នាក់ក្នុងសិល្បៈធ្លាប់រួមការងារជាមួយលោក អ៊ុន សិទ្ធា បានបង្ហោះសាររំលែកទុក្ខ និង បង្ហាញអារម្មណ៍រំជួលចិត្តសោកស្ដាយចំពោះមរណភាពរបស់តារាប្រុសរូបនេះ ដែលអ្នកនាងថាខានជួបលោកយូរ ស្មានតែលោកទៅនៅក្រៅប្រទេស តែបែរជាទទួលដំណឹងដ៏ក្រៀមក្រំនេះ។
សារនោះ អ្នកនាង សុភ័ក្រ្ត កុសុម៉ា បានបង្ហោះរៀបរាប់ថា ៖ «បាត់បងយូរ ប្អូនស្មានបងទៅនៅស្រុកគេ បងជាមនុស្សល្អណាស់ ស្លូតបូតគួរឱ្យគោរព ហើយជាពិសេសបងប្រុសដឹងគុណម្តាយណាស់ ហេតុអីបងឆាប់ទៅចោលបងប្អូនសិល្បៈលឿនបែបនេះ»៕
