និយាយពីអ្នកនាង ម៉េង កែវពេជ្ជតា មហាជនអ្នកគាំទ្របានជ្រាបហើយថាអ្នកនាងជាកំពូលតារាចម្រៀងស្រីចាស់វស្សាលំដាប់ជួរមុខម្នាក់ក្នុងប្រទេសកម្ពុជា និង ត្រូវបានមហាជនដាក់រហស្សនាមឱ្យថា «រាជិនីសំឡេងមាស»។
ពិតណាស់ ចំពោះរហស្សនាមនេះដែរ មហាជនពេញចិត្តដាក់ជូន ព្រោះតែកំពូលតារាចម្រៀងចាស់វស្សារូបនេះ មានសមត្ថភាពខ្ពស់ក្នុងវិស័យចម្រៀង ដែលអ្នកនាងមានទឹកដមសំឡេងពីរោះក្រអួនក្រអៅបែបបំពេរ និង ផ្អែមមុត ពេលដែលបង្ហើរសំនៀងបែបមនោសញ្ចេតនាម្តងៗ តែងតែធ្វើឱ្យអ្នកស្តាប់ដក់ចិត្ត លង់អារម្មណ៍តាមសំនៀងរបស់អ្នកនាង។
ម៉្យាងវិញទៀត មិនត្រឹមតែមានសមត្ថភាពច្រៀងបទមនោសញ្ចេតនា បុរាណប្រពៃណីបានពីរោះរណ្តំចិត្តប៉ុណ្ណោះទេ គឺកំពូលតារាចម្រៀងស្រីរូបនេះ អាចច្រៀងបានគ្រប់បទ គ្រប់ចង្វាក់ទាំងបទបុរាណ ទាំងបទពេញនិយម ហើយបច្ចុប្បន្ននេះគេឃើញថាមិនទាន់មានអ្នកជំនាន់ក្រោយណាមួយអាចបំបាក់អ្នកនាងបានឡើយ។ លើសពីសមត្ថភាពច្រៀងបានគ្រប់ទម្រង់ អ្នកនាង ម៉េង កែវពេជ្ជតា ក៏ស្ទាត់ជំនាញក្នុងតាក់តែងនិពន្ធបទចម្រៀងជាច្រើនថែមទៀតផង។
ដោយឡែក ថ្មីៗនេះ អ្វីកាន់តែចាប់អារម្មណ៍ និង រំភើបអបអរចំពោះកំពូលតារាចម្រៀងស្រីរូបនេះ ខណៈបានឃើញវីដេអូនៃកិច្ចសម្ភាសក្នុងកម្មវិធីសន្និសីទសារព័ត៌មានស្ដីពី «មហោស្របសិល្បៈដំណើរខ្មែរលើកទី ១» កាលពីថ្ងៃទី ២ ខែធ្នូ ឆ្នាំ ២០២៤ កន្លងទៅ ដែលអ្នកនាង ម៉េង ពេជ្ជតា បានបង្ហាញក្ដីរំភើបចិត្តខ្លាំង ក្រោយពីមហោស្របសិល្បៈដំណើរខ្មែរបានប្រកាសប្រសិទ្ធនាមឱ្យអ្នកនាងជា «រាជិនីសំឡេងមាសយុគសម័យសន្តិភាព»។
ចំពោះងារជា «រាជិនីសំឡេងមាសយុគសម័យសន្តិភាព» នេះដែរ តាមរយៈការរៀបរាប់របស់ប្រធានសិល្បៈដំណើរខ្មែរ ប្រាប់អ្នកសារព័ត៌មានក្នុងកម្មវិធីនោះឱ្យដឹងថា ការប្រសិទ្ធនាមនេះគឺចេញពីមហោស្របសិល្បៈដំណើរខ្មែរផ្ទាល់ដែលបានដាក់ងារជូន ដោយគណៈកម្មការបានមើលឃើញពីសមត្ថភាពរបស់អ្នកនាង ម៉េង កែវពេជ្ជតា ជាតារាចម្រៀងស្រីមានស្នាដៃច្រើន និង ទេពកោសល្យពហុជំនាញ ព្រមទាំងរក្សាបានប្រជាប្រិយភាពល្បីល្បាញជាច្រើនឆ្នាំកន្លងមកផងដែរ៕
