នៅក្នុងវិស័យគ្រឿងអលង្ការ លោក ឈិន ថង ត្រូវបានគេស្គាល់យ៉ាងច្បាស់ ជាអ្នកច្នៃម៉ូដ និង ជា CEO នៃហាង មាស ពេជ្រដ៏ល្បីនៅទីក្រុងភ្នំពេញគឺ Jin Hoc Jewelry។ ចំណោមគ្រឿងអលង្ការច្រើនប្រភេទ ក្នុងនោះមានគ្រឿងអលង្ការពីរប្រភេទ ដែលស្រដៀងគ្នាស្ទើរតែទាំងស្រុងនោះគឺ គ្រឿងអលង្ការម៉ូដនិយម និង គ្រឿងអលង្ការប្រណីត។ ដើម្បីញែកគ្នាឱ្យដាច់ លោក ឈិន ថង ដែលជាអ្នកឯកទេសគ្រឿងអលង្ការ នឹងធ្វើការបកស្រាយដូចខាងក្រោម៖
រៀបរាប់ទាំងញញឹម លោកថាសម្រាប់គ្រឿងអលង្ការម៉ូដនិយម គឺសំដៅដល់ម៉ូដដែលចម្លងតាមគ្នាពីមួយជំនាន់ទៅមួយជំនាន់ តាមសម័យកាលដែលមនុស្សពេញនិយម។ ចំណែកឯគ្រឿងអលង្ការប្រណីតវិញ ជាប្រភេទម៉ូដដែលត្រូវបានច្នៃឡើងដោយមានការផ្ចិតផ្ចង់ ហើយត្រូវមានការគិតឱ្យបានល្អិតល្អន់មុននឹងច្នៃវាចេញឡើង។
លោកលើកឡើងទៀតថា៖ «ភាគច្រើនអ្នកច្នៃម៉ូដគ្រឿងអលង្ការប្រភេទនេះ ត្រូវមានការគិតមុននឹងច្នៃថាតើម៉ូដមួយដែលយើងកំពុងច្នៃនេះ វាកើតចេញពីអារម្មណ៍របស់យើង ឬការទទួលបានការលើកទឹកចិត្តពីនរណាម្នាក់ ឬវត្ថុដែលនៅជុំវិញខ្លួនយើង ឬក៏ទីកន្លែងណាមួយដែលយើងបានទៅដល់។ ដូចឧទាហរណ៍ មានផ្ទាំងគំនូរមួយដែលធ្វើឱ្យយើងនឹកឃើញដល់អ្វីមួយ ដែលទាក់ទងទៅនឹងផ្ទាំងគំនូរនោះ ភ្លាមៗយើងក៏ចង់បញ្ចេញវាឡើងតាមរយៈការច្នៃម៉ូដគ្រឿងអលង្ការ ដោយធ្វើការគូសវាសនៅលើក្រដាសតែម្តង។»
សម្រាប់ការច្នៃម៉ូដគ្រឿងអលង្ការប្រណីត លោកបានលើកឡើងពីរចំណុចគោលក្នុងចង្វាក់ផលិតថា ទី ១ គឺចំណុចសំខាន់៖ មុនយើងសម្រេចចិត្តបង្ហាញម៉ូដដែលយើងច្នៃឡើង យើងត្រូវដាក់ចិត្តទុកវាជាស្នាដៃសម្រាប់ខ្លួនឯង។ ឧទាហរណ៍ នៅពេលគេឃើញម៉ូដមួយនេះ គេនឹងនឹកឃើញដល់ ឈិន ថង ជាអ្នកច្នៃម៉ូដម្នាក់។ ហេតុដូច្នេះក្នុងនាមជាអ្នកច្នៃម៉ូដ គឺត្រូវពិនិត្យមើលគ្រប់ជ្រុងជ្រោយ តាំងពីចំនួន ប្រភេទ និង គុណភាពត្បូងនៃគ្រឿងអលង្ការនីមួយៗ រួចមកទើបចាប់ផ្តើមពិភាក្សាជាមួយជាង។
ចំណែកចំណុចមួយទៀតគឺការលម្អិត៖ ត្រូវលម្អិតទៅលើគុណភាព និង ភាពងាយស្រួលដោយប្រាកដថាពេលពាក់ទៅ មិនមានអារម្មណ៍ធ្ងន់ ស្រួល និង មិនចាក់សាច់ជាដើម។ សំខាន់ទៀតនោះ ដើម្បីយល់ពីអ្នកពាក់ ត្រូវគិតថាតើគ្រឿងអលង្ការដែលយើងធ្វើហើយពាក់បានឬក៏អត់។ លោកថាការធ្វើគ្រឿងមិនមានអ្វីដែលពិបាកទេសម្រាប់អ្នកដែលស្រលាញ់ការងារនេះ ប៉ុន្តែអ្វីដែលត្រូវព្យាយាមខ្លាំងគឺ ត្រូវចំណាយពេលយូរក្នុងការធ្វើ ដោយសារយើងចង់បាននូវភាពឥតខ្ចោះរបស់វា៕
