កាលពីថ្ងៃទី ១៦ ខែតុលា ឆ្នាំ ២០២៥ កន្លងទៅ មានហេតុការណ៍បំផ្ទុះគ្រាប់បែកដ៏សាហាវមួយទៀតហើយ ដែលបានកើតឡើងនៅក្នុងខេត្តណារ៉ាធីវ៉ាត់ ដែលមកទល់ពេលនេះ មានការរាយការណ៍ថា អ្នកស្លាប់បានកើតឡើងដល់ ២ នាក់ និងរបួសបានឡើងដល់ ១៧ នាក់។
តាមព័ត៌មានបានឱ្យដឹងថា ហេតុការណ៍បានកើតឡើងនៅតាមផ្លូវដ៏មមាញឹកមួយខ្សែនៅក្នុងស្រុកយីង៉ ខេត្តណារ៉ាតធីវ៉ាត់ និងស្ថិតនៅក្នុងតំបន់លំនៅដ្ឋានដែលមានប្រជាជនរស់នៅច្រើន។ ក្នុងនោះ មានស្រ្តីចំណាស់វ័យ ៧៩ ឆ្នាំម្នាក់បានស្លាប់ភ្លាមៗនៅកន្លែងកើតហេតុ ខណៈកំពុងអង្គុយលក់ត្រី ហើយក្រោយមកទៀត បុរសវ័យ ២៩ ឆ្នាំ ក៏បានស្លាប់បន្តទៀត។
យ៉ាងណាមិញ អ្នករបួសបានកើនឡើងពី ១០ នាក់ រហូតដល់ ១៧ នាក់ ដែលភាគច្រើនសុទ្ធតែជាអ្នកធ្វើដំណើរតាមផ្លូវ ហើយពេលនេះកំពុងតែសម្រាកព្យាបាលនៅក្នុងមន្ទីរពេទ្យ។ ដោយឡែក ហេតុការណ៍លើកនេះ បានបង្កឱ្យមានការបាក់ស្បាត និងភ័យខ្លាចដល់ប្រជាជនក្នុងខេត្តណារ៉ាធីវ៉ាត់មិនស្ទើរឡើយ ព្រោះបញ្ជាក់ថាអំពើអសន្តិសុខកាន់តែធ្ងន់ធ្ងរទៅហើយ ជាពិសេសគឺក្រុមជនពាលចាប់ផ្តើមចេញមុខធ្វើបាបប្រជាជនស៊ីវិលហើយ៕
ប្រភព៖ Khaosod
