នៅព្រឹកថ្ងៃទី ១៤ ខែកក្កដា ឆ្នាំ ២០២៥ នេះ សម្តេចមហាបវរធិបតី ហ៊ុន ម៉ាណែត បានអញ្ជើញចូលរួមក្នុងសម្ពោធដាក់ឱ្យប្រើប្រាស់សមិទ្ធផលនៃមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយ និង អបអរសាទរខួបលើកទី ៣២ ទិវាកងរាជអាវុធហត្ថ នៅមជ្ឈមណ្ឌលហ្វឹកហ្វឺនកងរាជអាវុធហត្ថជុំសែនរីករាយ ស្ថិតនៅក្នុងខេត្តកំពង់ឆ្នាំង ដែលក្នុងនោះសម្តេចមហាបវរធិបតី បានបញ្ជាក់ថា សម្តេចបានឱ្យជាគោលការណ៍ដល់ក្រសួងពាក់ព័ន្ធ ក្នុងការរៀបចំវិសោធនកម្មច្បាប់ចំនួន ២ ក្នុងនោះមានទី១៖ ច្បាប់កាតព្វកិច្ចយោធា ឆ្នាំ ២០០៦ និង ទី២៖ ច្បាប់សោធន។
សម្តេចបានបញ្ជាក់ថា «ចាប់ពីឆ្នាំ ២០២៦ ទៅ នឹងចាប់ផ្តើមអនុវត្តនូវច្បាប់កាតព្វកិច្ចយោធា ដែលនេះគឺជាការប្តេជ្ញាចិត្តរបស់យើង»។ សម្តេចបានបន្តថា សម្តេចឱ្យពិនិត្យមើលក្នុងការកែសម្រួល ដែលកន្លងទៅ ត្រូវអនុវត្ត ១៨ ខែ ដែលរយៈពេល ១៨ ខែនេះ ជារយៈពេលខ្លីហ្វឹកហ្វឺនបានតិចបំផុត ដោយបូករួមទាំងនីតិវិធីផ្សេងៗ រួមទាំងការចល័តផងដែរ។ ដូច្នេះសម្តេចចង់ឱ្យកែទៅរយៈពេល ២៤ ខែវិញ ដែលគោលការណ៍នេះ មានការអនុវត្តនៅតាមបណ្តាប្រទេសជាច្រើន។
គួរឱ្យដឹងផងដែរថា ច្បាប់ស្តីពីកាតព្វកិច្ចយោធា ត្រូវបានប្រកាសឡើងកាលពីថ្ងៃទី ២២ ខែធ្នូ ឆ្នាំ២០០៦ ដោយមាន ៦ ជំពូក និង ១៨ មាត្រា។ ច្បាប់នេះបានកំណត់ថា ប្រជាពលរដ្ឋខ្មែរទាំង ២ ភេទ ដែលមានអាយុ ១៨ ដល់ ៣០ ឆ្នាំ ត្រូវតែបំពេញកាតព្វកិច្ចយោធា ហើយការបំពេញនេះទៀតសោតសម្រាប់ស្ត្រី គឺផ្អែកទៅតាមការស្ម័គ្រចិត្ត។ ក្នុងពិធីដដែលនេះ សម្តេចមហាបវរធិបតី បានពន្យល់បន្ថែមថា ច្បាប់នេះ ជួយឱ្យកម្ពុជា ទី១៖ បង្កើនបរិមាណបំពេញសាច់ទ័ព និង ទី២ បង្កើនប្រសិទ្ធភាពក្នុងការបំពេញសាច់ទ័ព ដែលការបំពេញសាច់ទ័ពនេះ នឹងធ្វើឱ្យកម្ពុជាមិនខ្វះកូនទាហាននោះទេសម្រាប់ថ្ងៃអនាគត។ សម្តេចបញ្ជាក់ថា «អ្វីដែលសំខាន់នោះគឺប្រសិទ្ធភាព ទ័ពដែលរើសជាកាតព្វកិច្ច យកទៅផ្សាំ ២ ឆ្នាំ ចប់ ២ ឆ្នាំគាត់មានលទ្ធភាពស្ម័គ្រចិត្ត គាត់ចង់ចូលសង្គម ឬគាត់ស្ម័គ្រចិត្តចូលជាទ័ពអាជីព»។
សម្តេចក៏បានមានប្រសាសន៍បន្ថែមទៀតថា បញ្ហានេះ ក៏ងាយស្រួលក្នុងការរើសកងទ័ព ដែលអាចជ្រើសរើសចេញពីអ្នកដែលចូលទៅបំពេញកាតព្វកិច្ចយោធាផងដែរ។ អ្នកដែលមិនត្រូវបានជ្រើសរើស ក្រោយពេលបំពេញកាតព្វកិច្ចយោធាហើយ ក៏អាចចូលទៅក្នុងសង្គម ដែលយ៉ាងហោចណាស់ក៏ពួកគេជាមនុស្សដែលបានអប់រំ បណ្តុះបណ្តាល មានវិន័យ ហើយបើសិនជាពលរដ្ឋមិនបានបណ្តុះបណ្តាលតាមរយៈការបំពេញកាតព្វកិច្ចយោធាទេ នោះពួកគេអាចជាមនុស្សផ្សេង ដែលបង្កបញ្ហាដល់សង្គមជាដើម។ សម្តេចបានបញ្ជាក់បន្ថែមទៀតថា៖ «បើសិនជាមានសភាពការណ៍ចាំបាច់ យើងមានទ័ពដែលអាចចុចឈ្មោះមកបាន ហើយគាត់មានការហ្វឹកហ្វឺនរួចជាស្រេច»៕
ប្រភព ៖ Fresh News
