ពលករខ្មែរត្រឡប់មកស្រុកវិញអស់! សមាជិកសភាថៃម្នាក់ ចាប់ផ្ដើមព្រួយចិត្តពីផលប៉ះពាល់សេដ្ឋកិច្ចថៃ ស្រាប់តែត្រូវពលរដ្ឋខ្លួនឯង នាំគ្នាប្រទេចផ្ដាសា

នៅថ្ងៃទី ២០ ខែសីហា ឆ្នាំ ២០២៥ នេះ លោក Rangsiman Rome ជាអ្នកនយោបាយ និង ជាសមាជិកសភាមកពីគណបក្សប្រជាជនថៃ ក៏ដូចជា ជាប្រធានគណៈកម្មាធិការសភាតំណាងទទួលបន្ទុកសន្តិសុខរដ្ឋ កិច្ចការព្រំដែនថៃ យុទ្ធសាស្ត្រ និងកំណែទម្រង់ជាតិ បានបង្ហាញក្តីបារម្ភរបស់ខ្លួនចំពោះសេដ្ឋកិច្ចជាតិ ក្រោយពីពលករខ្មែរត្រឡប់ទៅស្រុកស្ទើរតែទាំងអស់។

លោក Rangsiman Rome បានឱ្យដឹងថា នៅពេលនេះពលករខ្មែរដែលស្នាក់នៅស្របច្បាប់ក្នុងប្រទេសថៃ នៅសល់ប្រហែលជា ១០ ភាគរយ​ គឺ ៣ ម៉ឺននាក់ប៉ុណ្ណោះ ហើយកង្វះពលករខ្មែរនេះអាចប៉ះពាល់ដល់សេដ្ឋកិច្ចថៃ ព្រោះពលករខ្មែរមាននាទីសំខាន់ក្នុងវិស័យកសិកម្ម និងសំណង់របស់ថៃ។ ការចាកចេញរបស់ពួកគេ នឹងធ្វើឱ្យមានការរាំងស្ទះ និង ប៉ះពាល់ទៅដល់វិស័យទាំងនេះជាខ្លាំង ដូច្នេះហើយត្រូវរកវិធានការណ៍ដោះស្រាយជាបន្ទាន់។

លោក Rangsiman Rome បានឱ្យដឹងថា​ វាមិនត្រឹមតែជាបញ្ហាសន្តិសុខជាតិប៉ុណ្ណោះទេ ប៉ុន្តែវាថែមទាំងក្លាយជាបញ្ហាសេដ្ឋកិច្ចជាតិ និងជីវភាពរស់នៅរបស់ប្រជាជនផងដែរ ហើយគណៈកម្មាធិការសន្តិសុខកំពុងជំរុញការស្វែងរកដំណោះស្រាយក្នុងបញ្ហានេះ។ យ៉ាងណាមិញ ការយល់ឃើញរបស់លោក បានធ្វើឱ្យប្រជាជនថៃមួយចំនួនមិនពេញចិត្តឡើយ ដោយគិតថាលោកមិនស្នេហាជាតិ ហើយខ្វល់ខ្វាយចំពោះតែពលករខ្មែរទៅវិញ៕​

ប្រភព៖ Khaosod