មហាជនអ្នកគាំទ្រតារាចម្រៀងវ័យក្មេងលោក Step និង កញ្ញា SK ច្បាស់ជាបានជ្រាបហើយថា បច្ចុប្បន្នតារាចម្រៀងប្រុសស្រីវ័យក្មេងទាំង ២ រូបនេះ កំពុងតែជ្រកក្រោមផលិតកម្ម Gen Music ដូចគ្នា។
ក្នុងនោះ មិនត្រឹមតែការងារសិល្បៈនោះទេ ដែលលោក Step និង កញ្ញា SK ត្រូវបានមហាជនក្នុងស្រទាប់យុវវ័យចាប់អារម្មណ៍ចំពោះពួកគេទាំងពីរ ពោលគឺសូម្បីតែសកម្មភាព ទំនាក់ទំនងរបស់អ្នកទាំង ២ ក៏ត្រូវបានអ្នកគាំទ្រសង្កេតណាស់ដែរ។ តួយ៉ាង កន្លងមក លោក Step និង កញ្ញា SK ត្រូវបានមហាជនចាប់អារម្មណ៍ រហូតខ្លះផ្គូផ្គង់ចង់ឱ្យអ្នកទាំង ២ មានទំនាក់ទំនងស្នេហានឹងគ្នាទៀតផង។
ដោយឡែកមួយរយៈចុងក្រោយនេះ ខាងប្រុស គឺ លោក Step ក៏មិនបានលាក់លៀមទៀតនោះដែរ ដោយលោកធ្លាប់បាននិយាយជាសាធារណៈ និង ត្រូវបានចែកចាយវីដេអូពាសពេញបណ្តាញសង្គមថា លោកបានតាមសុំស្រឡាញ់ SK រយៈពេលជាង ៣ ឆ្នាំមកហើយ គ្រាន់តែមកដល់ពេលនេះ ខាងស្រីមិនទាន់ផ្ដល់ចម្លើយឱ្យលោកច្បាស់នៅឡើយ។ លើសពីនោះ ក្នុងវីដេអូនោះ លោក STEP ក៏បានសុំចម្លើយពី SK ម្ដងទៀតថាអាចរួមដំណើរជីវិតជាមួយគ្នាបានឬទេ ប៉ុន្តែខាងស្រីនៅតែមិនទាន់ឱ្យចម្លើយលោកបានដដែល។
ជាការពិត បើទោះជាមិនទាន់មានឈ្មោះជាសង្សារនៅឡើយមែន ប៉ុន្តែ លោក Step តែងតែបង្ហាញសកម្មភាពយ៉ាងយកចិត្តទុកដាក់ចំពោះកញ្ញា SK ដោយរៀងរាល់ថ្ងៃពិសេស លោកតែងតែមានកាដូជូនដល់នាងជានិច្ច។ ជាក់ស្តែង នៅថ្ងៃខួបកំណើតកញ្ញា SK ក្នុងឆ្នាំ ២០២៥ នេះ លោក Step បានចាយពេលវេលាយ៉ាងយកចិត្តទុកដាក់គូររូបគំនូរដោយដៃផ្ទាល់ជូនដល់ខាងស្រីថែមទៀតផង៕
