គិតមកទល់ពេលនេះ កំពូលតារាចម្រៀងស្រីអ្នកនាង ឱក សុគន្ធកញ្ញា បានចាប់ដៃសាងគ្រួសារជាមួយលោក អ៊ឹង សុខលី ពេញដោយក្ដីសុខសុភមង្គល អស់រយៈពេលជាង ៦ ឆ្នាំទៅហើយ។
បន្ទាប់ពីចាប់ដៃគ្នាសាងគ្រួសារមកដល់ពេលនេះដែរ អ្នកនាង ឱក សុគន្ធកញ្ញា និង ស្វាមី ទទួលបានទាយាទស្នងត្រកូលដែលជាកូនប្រុសចំនួន ២ រូបហើយ ដោយកាន់តែបន្ថែមនូវសុភមង្គល និង ភាពកក់ក្ដៅយ៉ាងពេញទំហឹងក្នុងគ្រួសារ ដែលកូនច្បងមានឈ្មោះថា អ៊ឹង បញ្ញាបុត្រ និង កូនទី ២ ឈ្មោះ អ៊ឹង រិទ្ធីបញ្ញា។
បើនិយាយចំពោះគ្រួសារកំពូលតារាចម្រៀង ឱក សុគន្ធកញ្ញា តែងទទួលបានការកោតសរសើរ និង ចិត្តច្រណែនជាខ្លាំងពីបណ្ដាទស្សនិកជនអ្នកគាំទ្រ ព្រោះថាជារឿយៗគ្រួសារតារាចម្រៀងស្រីរូបនេះ តែងបង្ហាញសកម្មភាពផ្អែមល្ហែម បង្ហាញក្ដីស្រឡាញ់ក្នុងជីវិតប្ដីប្រពន្ធ និង ផ្ដល់ភាពកក់ក្ដៅដល់កូនៗ ស្ដែងពីក្ដីសុខក្នុងរង្វង់គ្រួសារយ៉ាងពេញទំហឹង។
ជាក់ស្ដែង នៅថ្ងៃទី ១៦ ខែឧសភា ឆ្នាំ ២០២៥ នេះ ជាថ្ងៃគំរប់ខួបអាពាហ៍ពិពាហ៍ ៦ ឆ្នាំរបស់កំពូលតារាចម្រៀងស្រី ឱក សុគន្ធកញ្ញា និង ស្វាមី ធ្វើឱ្យអ្នកគាំទ្រកំពុងចាប់អារម្មណ៍ខ្លាំង ខណៈបានឃើញអ្នកនាងបង្ហាញរូបភាពជាច្រើនសន្លឹក ជាលក្ខណៈគ្រួសារតូចនៅលើកោះអភិជនមួយ ដែលរៀបចំកន្លែងអបអរថ្ងៃពិសេសនេះយ៉ាងរ៉ូមែនទិកជាមួយស្វាមី និង កូនៗទាំងពីរ ព្រមទាំងភ្ជាប់ជាមួយសារបង្ហាញក្ដីស្រឡាញ់ដ៏ផ្អែមល្ហែម និង មានអត្ថន័យបំផុត។
សារនោះ អ្នកនាង ឱក សុគន្ធកញ្ញា បានបង្ហោះរៀបរាប់ថា ៖ «ជីវិតពិតមិនដូចរឿងនិទាន.. តែមួយរយៈចុងក្រោយ ដែលមានពួកគាត់ចូលក្នុងជីវិតរបស់ខ្ញុំ ខ្ញុំហាក់បីទទួលបានគ្រប់យ៉ាងដូចក្នុងរឿងនិទាន អរគុណប្ដីសម្លាញ់ ដែលតែងតែផ្ដល់គ្រប់យ៉ាង ទោះប្រពន្ធមិនដែលទាមទារ។ ដំបូងចង់ប្រើជីវិតជាប្ដីប្រពន្ធស្របច្បាប់បង្ហាញអ្នកគ្រប់គ្នា ចង់ដើរលេងពីរនាក់បែប Romantic តែមានកូនតែម្ដងចឹង Romantic ជុំគ្នា Happy 6th Anniversary my dear husband Oeng RithiPanha – Presley Oeng Panhaboth – Charlie»៕
