ថ្មីៗនេះ លើបណ្ដាញសង្គមហ្វេសប៊ុក មហាជនអ្នកគាំទ្ររបស់កំពូលតារាចម្រៀងឧកញ៉ា ខេមរៈ សិរីមន្ត កំពុងផ្ទុះការចាប់អារម្មណ៍ភ្ញាក់ផ្អើល និង វែកញែកខ្លាំង ក្រោយពីបានឃើញកំពូលតារាចម្រៀងរូបនេះ បានបង្ហោះសារមួយលើកនិយាយជុំវិញរឿងតារាចម្រៀងរៀមច្បង រួមទាំងរូបលោកផ្ទាល់ តែងត្រូវបានអ្នកគាំទ្ររបស់តារាជំនាន់ថ្មីជេរប្រមាថមើលងាយរហូតមក។
ក្នុងនោះ ឧកញ៉ា ខេមរៈ សិរីមន្ត ក៏បានបង្ហាញឱ្យដឹងថារយៈពេលប៉ុន្មានឆ្នាំចុងក្រោយមកនេះ រូបលោក ក៏ដូចជាតារាចម្រៀងរៀមច្បងមួយចំនួន ត្រូវបានក្រុមអ្នកគាំទ្ររបស់តារាចម្រៀងជំនាន់ថ្មីតាមជេរប្រមាថមើលងាយ ព្រមទាំងចោទប្រកាន់ និង ប្រៀបធៀបលើស្នាដៃផលិតចម្រៀងរបស់លោក និង តារាចម្រៀងរៀមច្បងផ្សេងៗទៀត មិនចេះអ្វីក្រៅពី Copy ពីបរទេសទៀតផង។
សារនោះ កំពូលតារាចម្រៀង ខេមរៈ សិរីមន្ត បានរៀបរាប់ថា ៖ «រយៈពេល 7-8 ឆ្នាំចុងក្រោយនេះ បង និង តារាចម្រៀងរៀមច្បង លោកគ្រូ អ្នកគ្រូផ្នែកចម្រៀងស្ទើរតែទាំងអស់ ត្រូវបានក្រុមអ្នកគាំទ្ររបស់ប្អូនៗតារាចម្រៀងជំនាន់ថ្មីតាមជេរប្រមាថមើលងាយរហូតដោយចោទប្រកាន់ និង ប្រៀបធៀបថាពួកបង និង រៀមច្បងស្ទើរទាំងអស់គ្នាមិនចេះធ្វើអីក្រៅពី copy ចម្រៀងពីប្រទេសគេ ទាំងក្នុងស្ថានភាព ប្រទេសយើងស្ថិតក្នុងការលំបាកនាពេលអតីតកាល ហើយក្រុមអ្នកគាំទ្ររបស់ប្អូនៗ មានមោទកភាពព្រោះពួកប្អូនៗ ដោយពួកគាត់គិតថាប្អូនៗជាអ្នកនិពន្ធថ្មី ហើយបងក៏ធ្លាប់មានមោទកភាពប្អូនៗដែរ បងក៏បានផលិតចម្រៀងនិពន្ធថ្មីរយៈពេល 7 ឆ្នាំជាប់គ្នាមកនេះ បានខ្ទង់រយបទហើយ តែអ្វីៗបងមិននឹកស្មានថាប្អូនៗ Cheat បំភាន់សូម្បីតែហ្វេនរបស់ខ្លួនឯងថាខ្លួនជាអ្នកនិពន្ធថ្មី តែឥលូវនេះគឺបែកធ្លាយអស់ហើយគឺប្អូនៗ copy ពីប្រទេសគេរហូតដែរសោះ។
បងសោកស្ដាយចំពោះការមោទកភាពរបស់បង ចំពោះប្អូនៗកន្លងមក ហើយបានទទួលរងការប្រមាថពីហ្វេនរបស់ប្អូនៗរហូតមកដែរ តែមិននឹកស្មានថាប្អូនៗ ធ្វើចឹងសោះឈប់បានឈប់ទៅប្អូនៗសម្លាញ់ យើងធ្វើបានប៉ុនណាយើងប្រាប់គេត្រង់ៗទៅល្អជាងសម្រាប់យើងទាំងអស់គ្នា»៕
