ថ្មីៗនេះ រឿងភាគកូរ៉េដែលមានចំណងជើងថា «ចុងភៅឆ្លងភព» ឬ «bon appetit your majesty» បានឆក់យកអារម្មណ៍ទស្សនិកជនច្រើនណាស់ឱ្យជក់ចិត្តទស្សនាតាំងពីដើមដល់ចប់ ហើយក្រោយពីបញ្ចប់ រឿងភាគខាងលើទទួលបានការសរសើរមិនដាច់ពីមាត់នោះទេពីសំណាក់អ្នកទស្សនាជាច្រើននៅតាមបណ្តាប្រទេសនានា។
យ៉ាងណាមិញ មិនយូរប៉ុន្មាននេះ ស្រាប់តែមានអ្នកដឹកនាំរឿងជនជាតិថៃម្នាក់ឈ្មោះ PaaJaew បានចេញមុខមកលើកប្រៀបធៀបរឿង «ចុងភៅឆ្លងភព» និង រឿងភាគរបស់ខ្លួនដែលមានឈ្មោះ «คุณพี่เจ้าขา ดิฉันเป็นห่านมิใช่หงส์» មានន័យជាភាសាខ្មែរថា «លោកបង! ខ្ញុំជាក្ងាន មិនមែនជាហង្ស» ដែលបញ្ចប់ទៅកាលពីដើមឆ្នាំ ២០២៥ កន្លងទៅ។
អ្នកដឹកនាំរឿងជនជាតិថៃរូបនេះបាននិយាយថា ក្រោយពីមើលរឿង «ចុងភៅឆ្លងភព» របស់កូរ៉េរួចហើយ ខ្លួនពិតជាភ្ញាក់ផ្អើលខ្លាំងណាស់ ព្រោះរឿងនេះមានសាច់រឿងស្រដៀងនឹងរឿងដែលខ្លួនបានដឹកនាំ ដូចជាចំណុចដែលតួស្រីឆ្លងភពដូចគ្នា ហើយឆ្លងចំពេលសូរគ្រាស និង ចន្ទគ្រាសដូចគ្នា ព្រមទាំងចំណុចជាច្រើនទៀត។
គួរឱ្យដឹងដែរថា រឿង «คุณพี่เจ้าขา ดิฉันเป็นห่านมิใช่หงส์» មានន័យជាភាសាខ្មែរថា «លោកបង! ខ្ញុំជាក្ងាន មិនមែនជាហង្ស» របស់ថៃ ជារឿងឆ្លងភពដែរ ប៉ុន្តែតួស្រីគឺជាតារាល្បីមួយរូបនៅសម័យបច្ចុប្បន្ន ដោយបានចៃដន្យឆ្លងភពចូលទៅដល់សម័យរាជ្ជកាលពី ៣ ហើយចូលទៅក្នុងរាងកាយនារីម្នាក់ឈ្មោះថា ប៊ុនតា ដែលជាស្រ្តីរកស៊ីផ្លូវភេទមួយរូបនាសម័យនោះ រូចក៏បានជួបនឹងតួប្រុសដែលជាមន្រ្តីអភិជនម្នាក់ ដែលបានជួយជីវិតនាង៕
