ថ្មីៗនេះ នៅប្រទេសថៃកំពុងមានផ្ទុះករណីរបស់បុរសម្នាក់ ដែលលើកដៃទះកំផ្លៀងគ្រូពេទ្យ ដោយសារតែខឹងរឿងគ្រូពេទ្យមិនឱ្យនាំកូនចូលទៅមើលយាយដែលនៅបន្ទប់សង្រ្គោះបន្ទាន់ ព្រោះតែខ្លាចឆ្លងមេរោគ។
តាមព័ត៌មានបានឱ្យដឹងថា រឿងនេះបានកើតឡើងកាលពីថ្ងៃទី ១៦ ខែកុម្ភៈ ឆ្នាំ ២០២៥ កន្លងទៅ ហើយបើតាមគ្រូពេទ្យដែលជាជនរងគ្រោះបានឱ្យដឹងថា នៅថ្ងៃកើតហេតុខ្លួនបានជួយរ៉ាប់រងករណីរបស់អ្នកជំងឺវ័យចំណាស់ម្នាក់ ពីមិត្តរួមការងារ ដែលអ្នកជំងឺនោះកើតជំងឺផ្តាសាយធំ។ ខ្លួនបានចូលទៅផ្លាស់ខោអាវឱ្យអ្នកជំងឺហើយ ស្រាប់តែកូនស្រីរបស់អ្នកជំងឺក៏បានចូលមក ដោយនាំកូនអាយុប្រហែល ៦ ឆ្នាំចូលមកជាមួយផង។ ខ្លួនបានប្រាប់ទៅកាន់កូនស្រីអ្នកជំងឺថា អ្នកជំងឺកំពុងមានមេរោគនៅក្នុងសួត មិនគួរនាំកូនតូចមកជួបឡើយ វាអាចបណ្តាលឱ្យឆ្លងដល់ក្មេង ហើយក៏ឱ្យនាំក្មេងចេញទៅវិញ។
យ៉ាងណាមិញ មួយសន្ទុះក្រោយមក ស្រាប់តែមានបុរសម្នាក់ដើរមកសួរទាំងមួម៉ៅថា តើអ្នកណានិយាយស្តីមិនល្អដាក់ប្រពន្ធកូនខ្លួនអម្បិញមិញ ហើយគ្រាន់តែគ្រូពេទ្យដែលជាជនរងគ្រោះមកដល់ភ្លាម ស្រាប់តែបុរសរូបនេះក៏បានទះគ្រូពេទ្យ ២ កំផ្លៀងខ្លាំងៗ ហើយក៏ដើរចេញទៅបាត់ទៅ។ ដោយឡែក ក្រោយកើតហេតុខាងគ្រូពេទ្យបាននាំគ្នាជួយហៅប៉ូលិសមកឃាត់ខ្លួនបុរសរូបនោះទៅ ហើយក៏បានដាក់បណ្តឹងទៅតាមច្បាប់ផងដែរ៕
សូមចុចទីនេះដើម្បីទស្សនាវីដេអូ៖
ប្រភព៖ Khaosod
