កាលពីថ្ងៃទី ៧ ខែមេសា ឆ្នាំ ២០២៥ កន្លងទៅនេះ តារាស្រី Kana Rinyarat ដែលជាតារាសម្តែងមួយរូបរបស់ថៃ បានចេញបកស្បែកមុខអតីតសង្សារ ដែលបន្លំខ្លួនជាលោកធំហាយសូរ អាងថាធ្វើការរាជការ ជិតស្និទ្ធជាមួយនឹងនាយករដ្ឋមន្រ្តីទៀត។
Kana បានរៀបរាប់ឱ្យដឹងថា នាងបានស្គាល់បុរសរូបនេះកាលពីចុងឆ្នាំ ២០២៤ កន្លងទៅ តាមរយៈកម្មវិធីរកដៃគូមួយ។ តែពេលនោះនាងមិនទាន់ដាច់ស្រេចជាមួយសង្សារចាស់ ទើបមកមើលចិត្តគ្នាទាក់ទងគ្នាមែនទែនកាលពីខែកុម្ភៈ ឆ្នាំ ២០២៥ កន្លងទៅនេះឯង។ នៅពេលទាក់ទងគ្នាបុរសនេះតែងតែអួតអាងថាខ្លួនជាអ្នកធំ ស្គាល់ថ្នាក់លើច្រើន ព្រោះរូបគេជាទីប្រឹក្សានាយករដ្ឋមន្រ្តី ដែលធ្វើឱ្យនាងក៏ជឿស្លុង ដោយសារតែពេលគេមករកនាងម្តងៗ គេស្លៀកពាក់ពេញយស និង ជិះសុទ្ធតែឡានមានក្បួនហែហមពេញផ្លូវ។ លើសពីនេះទៀត នៅពេលសង្សារចាស់នាងមានបញ្ហាទាក់ទងនឹងជំនួញខុសច្បាប់ បុរសនេះក៏អះអាងថាខ្លួនបានពឹងនាយករដ្ឋមន្រ្តីឱ្យជួយ តែនាងត្រូវឱ្យថ្លៃទឹកតែ ដែលនាងក៏បានឱ្យលុយគេទៅអស់ចំនួន ៩.៨ ម៉ឺនបាត។
លុះទាក់ទងគ្នាបានជាង ១ ខែ គេក៏បានសុំនាងរៀបការ នាងក៏យល់ព្រម តែក្រោយមកនាងក៏ចាប់បានថាគេមានប្រពន្ធរួចហើយ ទើបនាងក៏បានសុំបែក។ ក្រោយមកនាងក៏ដឹងរឿងថាគេបានបោកបញ្ឆោតនាងគ្រប់យ៉ាង យកទាំងលុយនាងទៅទៀត ហើយនាងក៏សម្រេចិត្តចេញមកបកស្បែកមុខគេដូច្នេះ។ យ៉ាងណាមិញ ពេលនេះខាងប្រុសក៏ត្រូវបានប៉ូលិសឃាត់ខ្លួន និង ចាប់ផ្តើមត្រួតពិនិត្យដំណើរការក្តីក្រោមបទឆបោក និង ការយកគ្រឿងយសរាជការមកប្រើប្រាស់ដោយគ្មានការអនុញ្ញាតទៀត៕
ប្រភព៖ Thairath
