កាលពីថ្ងៃទី ១៥ ខែតុលា ឆ្នាំ ២០២៥ កន្លងទៅនេះ មានករណីជនបរទេសម្នាក់ ត្រូវបានប្រទះឃើញស្លាប់នៅក្នុងសណ្ឋាគារមួយកន្លែងនាប្រទេសថៃ ក្រោយពីបានចូលស្នាក់នៅបានប្រមាណជា ៤ ម៉ោងប៉ុណ្ណោះ។
តាមព័ត៌មានបានឱ្យដឹងថា សណ្ឋាគារខាងលើនេះ ស្ថិតនៅតាមបណ្តោយផ្លូវស៊ីលុំ សង្កាត់ស៊ីលុំ ខណ្ឌបាងរ៉ាក់ ទីក្រុងបាងកក។ នៅថ្ងៃកើតហេតុ ជនបរទេសរូបនេះ អាយុប្រហែល ៣៥ ទៅ ៤៥ ឆ្នាំ មិនត្រូវបានគេស្គាល់សញ្ជាតិ បានចូលមកស្នាក់នៅក្នុងបន្ទប់មួយនាជាជាន់ទី ១៦ នៃសណ្ឋាគារ លុះក្រោយមកប្រមាណជា ៤ ម៉ោង ស្រាប់តែគេឃើញជនបរទេសរូបនេះ ដេកស្លាប់ក្នុងថ្លុកឈាមនៅជាន់ផ្ទាល់ដីកន្លែងចតឡាន ដោយមានការបែកក្បាល បាក់ដៃ និងបាក់ជើង។
យ៉ាងណាមិញ ខាងអាជ្ញាធរបានចុះមកត្រួតពិនិត្យ ហើយសន្ឋិដ្ឋានថាជនបរទេសរូបនេះបានលោតសម្លាប់ខ្លួន ហើយក៏បានបញ្ជូនសពទៅធ្វើកោសល្យវិច្ច័យ និងត្រួតពិនិត្យថាជាជនជាតិអ្វីមកពីណាឱ្យពិតប្រាកដ ព្រោះនៅលើខ្លួនជនរងគ្រោះមិនមានឯកសារណាមួយដែលអាចបញ្ជាក់អត្តសញ្ញាណបានឡើយ៕
ប្រភព៖ Khaosod
