ជារឿងដ៏គួរឱ្យភ្ញាក់ផ្អើល ដោយកាលពីយប់ថ្ងៃទី ១៨ ខែវិច្ឆិកា ឆ្នាំ ២០២៤ ថ្មីៗនេះ មហាជនអ្នកប្រើប្រាស់បណ្ដាញសង្គមហ្វេសប៊ុក បាននាំគ្នាចែករំលែកបន្តគ្នាព្រោងព្រាតចំពោះដំណឹងស្វែងរកអតីតកីឡាករបាល់ទាត់ជម្រើសជាតិកម្ពុជា ណុប តុលា ដែលលោកបានចាកចេញពីផ្ទះ ព្រមទាំងបង្ហោះសារលាក្រុមគ្រួសារ សោកស្ដាយចំពោះទង្វើដែលលោកបានធ្វើ។
តាមរយៈការបង្ហោះពីគណនីឈ្មោះ Nob Tola នៅថ្ងៃទី ១៨ ខែវិច្ឆិកា ឆ្នាំ ២០២៤ វេលាម៉ោង ៩ យប់ បានបង្ហោះសារឱ្យដឹងថា ៖ «ខ្ញុំសោកស្ដាយអ្វីដែលខ្ញុំធ្វើ ខ្ញុំកែខ្លួនលែងបានហើយ លក់ទាំងឈ្មោះ លក់ទាំងកេរ្តិ៍ឈ្មោះខ្លួនឯង និង គ្រួសារ ពេលខ្ញុំលាអ្នកទាំងអស់គ្នាហើយ Rip សុំទោសប្រពន្ធសម្លាញ់ និង កូនប៉ាម៉ាក់»។
យ៉ាងណាមិញ គិតត្រឹមម៉ោង ១១ យប់ ថ្ងៃទី ១៨ ខែវិច្ឆិកា ឆ្នាំ ២០២៤ គឺមិនទាន់ទទួលបានដំណឹងរបស់អតីតកីឡាករបាល់ទាត់ជម្រើសជាតិកម្ពុជា ណុប តុលា នៅឡើយទេ ខណៈក្រោយបង្ហោះសារលាក្រុមគ្រួសារ លោកបានបន្សល់ទុកម៉ូតូ និង សម្ភារៈនៅម្តុំស្ពានព្រែកសំរោង ដែលនាំឱ្យក្រុមគ្រួសារ ព្រមទាំងភរិយារបស់លោក បាននាំគ្នាចុះស្វែងរក និង បានអុជធូបបន់ស្រន់ម្ចាស់ទឹកម្ចាស់ដីនៅស្ពានព្រែកសំរោង ស្ថិតក្នុងសង្កាត់តាខ្មៅ ក្រុងតាខ្មៅ ខេត្តកណ្តាល៕
