ព្រឹកមិញ! ឆេះកន្លែងចែកចាយអគ្គិសនីខ្នាតធំមួយនៅថៃ ដាច់ភ្លើងអស់មួយក្រុង មន្ទីរពេទ្យកំពុងចលាចលគ្មានភ្លើងប្រើប្រាស់

នៅព្រឹកម៉ោង ៧ និង ៤០ នាទី ថ្ងៃទី ២២ ខែសីហា ឆ្នាំ ២០២៥ នេះ នៅប្រទេសថៃ មានករណីឆេះកន្លែងចែកចាយអគ្គិសនីមួយកន្លែង បង្កឱ្យមានការដាច់ភ្លើងអស់ទូទាំងក្រុង ធ្វើឱ្យមហាជនជ្រួលច្របល់គ្មានភ្លើងប្រើប្រាស់។

តាមព័ត៌មានបានឱ្យដឹងថា អគ្គិភ័យនេះ បានកើតឡើងទៅលើម៉ាស៊ីនចែកចាយអគ្គិសនីខ្នាតធំមួយ នៅក្នុងស្ថានីយ៍អគ្គិសនីផេចឆៈបុរី ស្រុកមឿង ខេត្តផេចឆៈបុរី។ ក្នុងនោះ អគ្គិភ័យបានឆាបឆេះយ៉ាងសន្ធោសន្ធៅ និង បានបណ្តាលឱ្យដាច់ចរន្តអគ្គិសនីនៅទូទាំងទីក្រុងផេចឆៈបុរី ធ្វើឱ្យប៉ះពាល់ដល់ការិយាល័យរដ្ឋាភិបាល មន្ទីរពេទ្យ ហាងអាហារ និងហាងទំនិញជាច្រើននៅក្នុងទីក្រុង។

យ៉ាងណាមិញ អាជ្ញាធរបានចុះទៅអន្តរាគមន៍ជាបន្ទាន់ ដោយប្រើប្រាស់ពេលប្រមាណ ២០ នាទីទើបអាចពន្លត់ភ្លើងបាន តែម៉ាស៊ីនចែកចាយខាងលើបានខូចខាតយ៉ាងធ្ងន់ធ្ងរ មិនអាចជួសជុលឡើងវិញបានភ្លាមៗឡើយ ទើបអាជ្ញាធរក៏បានដោះស្រាយ ដោយបានប្តូរទៅយកប្រភពអគ្គិសនីពីម៉ាស៊ីនផ្សេងៗ ដើម្បីផ្គត់ផ្គង់ឱ្យប្រជាជនជាបណ្តោះអាសន្នសិន៕

ប្រភព៖ Khaosod