សារព័ត៌មានរបស់ចិន បានរាយការណ៍ពីករណីមិននឹកស្មានមួយ ដែលមានឆ្មាមួយក្បាលធ្លាក់ចូលក្នុងឆ្នាំងស៊ុបនៅហាងមួយកន្លែង បណ្តាលឱ្យខ្ទាតទឹកស៊ុបរលាកមនុស្សរហូតដល់ទៅ ៩ នាក់។
តាមព័ត៌មានបានឱ្យដឹងថា ហេតុការណ៍បានកើតឡើងកាលពីថ្ងៃទី ២ ខែមេសា ឆ្នាំ ២០២៥ កន្លងទៅ នៅក្នុងហាងស៊ុបមួយកន្លែងក្នុងប្រទេសចិន។ ក្នុងនោះខណៈភ្ញៀវកំពុងអង្គុយហូបស៊ុបសុខៗ ស្រាប់តែមានសត្វឆ្មាមួយក្បាលធ្លាក់មកចំក្នុងឆ្នាំស៊ុបតែម្តង ដែលបណ្តាលឱ្យមនុស្សចំនួន ៩ នាក់បានរលាកស្រាល ព្រមទាំងមានអ្នកខ្លះក៏ខូចខាតទូរស័ព្ទ រីឯសត្វឆ្មាក៏ត្រូវរបួសធ្ងន់។
យ៉ាងណាមិញ ខាងម្ចាស់ហាងបានបញ្ជូនភ្ញៀវក៏ដូចជាសត្វឆ្មាទៅកាន់មន្ទីរពេទ្យ ព្រមទាំងបានចេញថ្លៃព្យាបាលឱ្យទាំងអស់ ហើយក៏ចេញថ្លៃជួសជុលទូរស័ព្ទ ព្រមទាំងមិនយកលុយថ្លៃស៊ុបទៀត។ លើសពីនេះទៅទៀត ម្ចាស់ហាងក៏បានយកសត្វឆ្មាមួយក្បាលនោះមកចិញ្ចឹមផងដែរ ក្រោយពីព្យាបាលវាហើយ ដែលធ្វើឱ្យមហាជននៅតាមបណ្តាញសង្គមនាំគ្នាសរសើរមិនដាច់ពីមាត់៕
ប្រភព៖ Khaosod
